ހުޅުމާލެ ފޭސް 2 ގެ ހިޔާ ފްލެޓް ސަރަހައްދުގައި ހުންނަ 5 ވަނަ ޓަވަރުގައި ރޭ ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު އާއިލާތަކަށް ވަގުތީ ބޯހިޔާވަހިކަން ހަމަޖައްސައިދީފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ. މި ހާދިސާ ހިނގާފައިވަނީ އިއްޔެ އިރުއޮއްސުނު ވަގުތު އެ ޓަވަރުގެ 24 ވަނަ ބުރީގެ އެޕާޓްމަންޓެއްގައެވެ.
އެންޑީއެމްއޭއިން ހާމަކުރި ގޮތުގައި މި ހާދިސާގެ އަސަރު އެ ޓަވަރުގެ 7 އެޕާޓްމަންޓަކަށް ކޮށްފައިވެއެވެ. އެގޮތުން އެ ތަންތަނުގައި ދިރިއުޅޭ މީހުންގެ ތެރެއިން 37 މީހަކަށް ވަނީ އެހީތެރިކަން ފޯރުކޮށްދީ، ރޭގެ ވަގުތެއްގައި ވަގުތީ ބޯހިޔާވަހިކަން ހަމަޖައްސައިދީފައެވެ. މައުލޫމާތު ލިބިފައިވާ ގޮތުގައި އަލިފާން ރޯވުމާއެކު އެ ސަރަހައްދަށް ވަރަށް ބޮޑަށް ދުންބޯވެ، ފްލެޓްތަކުގައި ތިބި މީހުންނަށް ދަތިތަކާ ކުރިމަތިވިއެވެ.
މި ހާދިސާއާ ގުޅިގެން އެމްއެންޑީއެފް ފަޔާ އެންޑް ރެސްކިއު ސާވިސްއިން ވަނީ ވަގުތުން ހަރަކާތްތެރިވެ އަލިފާންގަނޑު ކޮންޓްރޯލްކޮށްފައެވެ. ނަމަވެސް އަލިފާނުގެ ސަބަބުން އެ އިމާރާތުގެ ނަރުދަމާ ނިޒާމަށް ވަނީ ގެއްލުންތަކެއް ލިބިފައެވެ. ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިހާރު ދަނީ ލިބުނު ގެއްލުންތައް ވަޒަންކޮށް، ނަރުދަމާ ނިޒާމު މަރާމާތު ކުރުމުގެ މަސައްކަތް ކުރަމުންނެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ކަމާބެހޭ އިދާރާތައް ގުޅިގެން މިހާރު އަންނަނީ ތަހުގީގު ކުރަމުންނެވެ. އަދި މިކަމާ ގުޅިގެން އެއްވެސް ފަރާތަކުން އިތުރު އެހީތެރިކަމެއް ބޭނުންވާނަމަ، އެންޑީއެމްއޭގެ ހޮޓްލައިން ނަންބަރު 115 އަށް ގުޅުމަށް އެ އޮތޯރިޓީން ވަނީ އިލްތިމާސްކޮށްފައެވެ.
