ކުދިން ގޭތެރޭގައި ބަންދުވެފައި ތިބުމާއި، ސްކްރީނަށް ބަލަން ގިނަ ވަގުތު ހޭދަކުރުމުގެ ސަބަބުން ކުޑަކުދިންގެ ލޮލުގެ ފެނުން ދަށްވެ، ނަންބަރު އައިނު ހައްދަންޖެހޭ މިންވަރު ދުނިޔޭގެ ފެންވަރުގައި އިންތިހާއަށް އިތުރުވަމުންދާ ކަމަށް ދިރާސާތަކުން ދައްކައިފިއެވެ. ސައިންސްވެރިން ބުނާ ގޮތުގައި މީގެ މައިގަނޑު ހައްލަކީ ކުދިން ބޭރަށް ނެރުމެވެ.
މިކަމާ ގުޅޭގޮތުން “އެމެރިކަން އެކަޑަމީ އޮފް އޮފްތަލްމޮލޮޖީ” އިން ހާމަކޮށްފައިވާ ގޮތުގައި، ގޭތެރޭގެ މަޑު އަލީގައި ގިނަ ވަގުތު ހޭދަކުރުމަކީ ކުއްޖާގެ ލޮލުގެ ލެންސްގެ ބައްޓަމަށް ބަދަލު އައިސް، ދުރު ނުފެނުމުގެ މައްސަލަ ކުރިމަތިވާ ކަމެކެވެ.
އޮސްޓްރޭލިއާގެ ނެޝަނަލް ޔުނިވާސިޓީގެ ރިސާޗަރެއް ކަމަށްވާ ޕްރޮފެސަރު އިއަން މޯގަން ކުރެއްވި ދިރާސާއެއްގައި ވަނީ ވަރަށް މުހިންމު ހަގީގަތެއް ހޯއްދަވާފައެވެ. އޭނާ ވިދާޅުވާ ގޮތުގައި މައްސަލައަކީ ހަމައެކަނި ސްކްރީން ބެލުމެއް ނޫނެވެ. މައްސަލައަކީ އިރުގެ އަލިކަން ލޮލަށް ނުލިބުމެވެ.
“އިރުގެ އަލިކަމުގެ ސަބަބުން ލޮލުގެ ރެޓިނާގައި ‘ޑޯޕަމިން’ ކިޔާ ކެމިކަލެއް އުފައްދައިދޭ. މިއީ ލޮލަށް މުހިންމު މާއްދާއެއް. ގޭތެރޭގައި ބަންދުވެފައި ތިބޭނަމަ މި މާއްދާ އުފެދުން މަދުވެ، ލޯ ފުސްވެ، ނަންބަރު އައިނު އެޅުން އަދި ނަންބަރު އިތުރުވުމަށް މެދުވެރިވޭ،” ޕްރޮފެސަރު މޯގަން ވިދާޅުވިއެވެ.
ކެމްބްރިޖް ޔުނިވާސިޓީން ކުރިއަށް ގެންދިޔަ ދިރާސާއަކުން ދައްކާ ގޮތުގައި، ހަފްތާއަކު އިތުރަށް ބޭރުގައި ހޭދަކުރާ ކޮންމެ އެއް ގަޑިއިރަކުން، ކުއްޖާގެ ލޮލުގެ ނަންބަރު މަތިވުމުގެ ފުރުސަތު 2 އިންސައްތަ ކުޑަވެގެން ދެއެވެ.
ސިންގަޕޫރު ނެޝަނަލް އައި ސެންޓަރުގެ ޑިރެކްޓަރު، ޑރ. ޑޮނަލްޑް ޓޭން ވިދާޅުވާ ގޮތުގައި ކުދިންގެ ލޮލުގެ ސިއްހަތު ސަލާމަތް ކުރުމަށްޓަކައި ކޮންމެ ދުވަހަކު މަދުވެގެން 2 ގަޑިއިރު ގެއިން ބޭރުގައި، އިރުގެ އަލިކަން ހުންނަ ވަގުތުތަކުގައި ކުޅެން އުޅުމަކީ ކޮންމެހެން ކުރަންޖެހޭ ކަމެކެވެ.
“މައިންބަފައިންނަށް އަޅުގަނޑު ދޭނެ ނަސޭހަތަކީ، ކުދިން ޓެބްލެޓް ދޫކޮށްލާފައި ބޭރަށް ނުދާނަމަ، ގަދަކަމުން ވެސް ބޭރަށް ނެރޭށޭ. ގަސްގަހާގެހި ހުންނަ ފެހި މާހައުލުތަކަށް ބެލުމާއި، ދުރުގައި ހުންނަ ތަކެއްޗަށް ބެލުމަކީ ލޮލުގެ ކަސްރަތެއް،” ޑރ. ޓޭން ވިދާޅުވިއެވެ.
