ރާއްޖޭގެ ބައިނަލްއަގުވާމީ އަދި އެތެރޭގެ އުދުހުންތަކާ ގުޅޭ ހުރިހާ އެއާޕޯޓްތަކަކީ ވެސް، މޯލްޑިވްސް ސިވިލް އޭވިއޭޝަން އޮތޯރިޓީގެ ހުއްދައާއެކު ދިވެހި އިދާރާތަކުން ހިންގާ ތަންތަންކަމުގައި ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ.
ރާއްޖޭގެ އެކި ސަރަހައްދުތަކުގައި ހުރި އެއާޕޯޓްތައް އޮޕަރޭޓް ކުރަމުންދަނީ ގައުމީ ގާނޫނުތަކާއި ބައިނަލްއަގުވާމީ އޭވިއޭޝަން މިންގަނޑުތަކަށް ފެތޭ ގޮތަށް، ރާއްޖޭގެ ހުއްދަ ލިބިފައިވާ ފަރާތްތަކުންކަން ފާހަގަކޮށް މިނިސްޓަރު ވިދާޅުވީ މި ނިންމުމަކީ ގައުމުގެ މުހިންމު އުމްރާނީ ވަސީލަތްތަކުގެ މައްޗަށް ދައުލަތުގެ ބާރުވެރިކަން ދެމެހެއްޓުމަށާއި، ދިވެހިންގެ ގާބިލުކަން ތަރައްގީކުރުމަށް ސަރުކާރުން ދޭ އަހަންމިއްޔަތު ރަމްޒުކޮށްދޭ ކަމެއް ކަމުގައެވެ.
މީގެ އިތުރުން މިނިސްޓަރީން ބުނީ އެއާޕޯޓްތައް ހިންގުމުގެ ޒިންމާ ދިވެހި މުއައްސަސާތަކާ ހަވާލުވެފައި އޮތުމަކީ، ސަލާމަތީ ކަންކަން އެއް ފެންވަރެއްގައި ހިފެހެއްޓުމަށާއި، ގަވާއިދުތަކަށް ފުރިހަމައަށް އަމަލުކުރާކަން ޔަގީންކުރުމަށް ލިބޭ ބާރެއްކަމަށެވެ. މީގެ އިތުރުން، މީގެ ސަބަބުން ދިވެހި ފަންނުވެރިންނަށް މި ދާއިރާއިން ތަމްރީނާއި ވަޒީފާގެ ފުރުސަތުތައް ފަހިވެ، ދެމެހެއްޓެނިވި ގޮތެއްގައި އެއާޕޯޓްތައް ކުރިއަށް ގެންދިއުމަށް މަގުފަހިވެގެންދާނެކަމަށް މިނިސްޓަރު ވަނީ ބުނެފައެވެ.
މި އުސޫލަށް އަމަލުކުރުމުން، ދަތުރުވެރިންނަށާއި އެއާލައިންތަކަށް ރާއްޖޭގެ އެއާޕޯޓްތަކުގެ ރައްކާތެރިކަމާމެދު އޮންނަ އިތުބާރު ބޮޑުވެގެންދާނެކަން ފާހަގަކޮށް މިނިސްޓްރީން ބުނީ ރެގިއުލޭޓަރުންނާއި ހިދުމަތްދޭ ފަރާތްތަކުގެ މެދުގައި އޮންނަ ގުޅުން ހަރުދަނާވެ، އޮޕަރޭޝަނަލް ކަންކަމުގައި އަވަސް ހައްލުތައް ހޯދުމަށް ފަސޭހަވެގެންދާނެ ކަމަށެވެ.
