އާންމުކޮށްފައިވާ ވަގުތީ ރިޕޯޓުގައިވާ ގޮތުން މި ފަހަރުގެ އިންތިހާބުގައި ދެ އިންތިހާބު އެއްކޮށް ޖުމުލަ 1362 ގޮނޑިއަށް މެންބަރުން ހޮވާނެއެވެ. އޭގެ ތެރޭގައި ރަށު ކައުންސިލްތަކަށް 629 މެންބަރުންނާއި ސިޓީ ކައުންސިލްތަކަށް 52 މެންބަރުން ހިމެނެއެވެ. ގާނޫނީ ގޮތުން ގެނައި ބަދަލުތަކާ އެކު، އާބާދީ 2000 މީހުންނަށްވުރެ ދަށް ރަށްރަށުގައި ތިން ކައުންސިލަރުން އަދި އާބާދީ އެއަށްވުރެ ބޮޑުނަމަ ފަސް ކައުންސިލަރުން ތިބޭނެއެވެ. އަދި އައްޑޫ ސިޓީގެ ހުޅުދޫ އާއި މީދޫއަށް މި ފަހަރު ވަކި ކައުންސިލްތަކެއް އިންތިހާބު ކުރުމަށް ވަނީ ހަމަޖެހިފައެވެ.
މި ރިޕޯޓަށް ޝަކުވާ ހުށަހެޅުމުގެ ފުރުސަތު މި މަހުގެ 15 ވަނަ ދުވަހުގެ ނިޔަލަށް އޮންނާނެ ކަމަށް އިލެކްޝަންސް ކޮމިޝަނުން ބުންޏެވެ. ޝަކުވާ ބަލައިގަތުން ކުރިއަށްދާނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން މެންދުރުފަހު 3:00 އަށެވެ. ހުކުރު ދުވަހު ޝަކުވާ ބަލައިގަންނާނީ މެންދުރުފަހު 3:00 އިން ހަވީރު 5:00 އަށެވެ. ޝަކުވާ ހުށަހަޅަން ބޭނުންވާ ފަރާތްތަކުން ކޮމިޝަނުގެ އިދާރާއަށް ނުވަތަ އީމެއިލް މެދުވެރިކޮށް ހުށަހެޅޭނެއެވެ.
