މި އަހަރުގެ ވޯލްޑް ސައިޓް ޑޭ ފާހަގަކުރުމަށް އައިކެއާއިން ފެށި ސްޓޫޑެންޓް އާޓް ކޮމްޕެޓިޝަނަށް، ކުރެހުން ހުށަހެޅުމުގެ މުއްދަތު އިތުރުކޮށްފިއެވެ. މި މުބާރާތަށް ކުރެހުން ހުށަހެޅުމުގެ ފުރުސަތު ފުރަތަމަ ހުޅުވާލީ އޮކްޓޯބަރު 6 2025ގެ ނިޔަލަށެވެ. ނަމަވެސް މިހާރު އެ މުއްދަތު ވަނީ 10 އޮކްޓޯބަރު 2025 ވާ ހުކުރު ދުވަހުގެ ނިޔަލަށް އިތުރުކޮށްފައެވެ.
އައިކެއާއިން ބުނީ އުމުރުން 11 އަހަރާއި 15 އަހަރާ ދެމެދުގެ ދަރިވަރުންނަށް ހުޅުވާލާފައިވާ މި މުބާރާތުގައި، ދިރިއުޅުމާއި މުޖުތަމައުގެ ތަސައްވުރާއި ލޮލުގެ ސިއްހަތުގެ މާނައާ ގުޅޭ ގޮތުން ވިސްނާލުމަށް ފުރުސަތު ލިބޭނެ ކަމަށެވެ. މި ޝިއާރަށް ހޭލުންތެރިކުރުމަށާއި، ފިޔަވަޅު އެޅުމަށް ބާރުއެޅުމަށް އައިކެއާއިން ބާއްވާ ހަރަކާތްތަކާއެކު ދަރިވަރުންނަށް ހާއްސަ އާޓް ކޮމްޕެޓިޝަނެއް ވެސް ވަނީ އިއުލާންކޮށްފައެވެ.
މި މުބާރާތުގެ ބައިވެރިންނަށް ދެ ތީމެއް ހިޔާރުކުރެވޭނެއެވެ. އެއީ އަމިއްލަ ލޮލުގެ ދުޅަހެޔޮ ކަމަށް ލޯބިކުރުމާ ގުޅޭ ތީމަކާއި ލޮލުގެ ދުޅަހެޔޮ ކަމަށް ކުރާ މަސައްކަތުގައި ފަރުދުންނާއި މުޖުތަމައު އިސްކުރުމުގެ މުހިންމުކަން ރަމްޒުކޮށްދޭ ތީމްއެކެވެ.
ހުށަހެޅުމުގެ ގައިޑްލައިން:
އައިކެއާއިން ބުނީ ހުރިހާ ހުށަހެޅުމެއްގައި ވެސް، ބައިވެރިޔާގެ ފުރިހަމަ ނަމާއި، އުމުރާއި، އައިޑީކާޑު ކޮޕީއާއި ސްކޫލް ނަމާއި ގްރޭޑާއި، ބެލެނިވެރިޔާއަށް ގުޅޭނެ ނަންބަރާއި އީމެއިލް އަދި ކުރެހި ތީމް ލިޔެފައި އޮންނަން ވާނެ ކަމަށެވެ.
މި މުބާރާތް ކުރިއަށްދާނީ ދެ ބުރަކަށް ބަހާލައިގެންނެވެ. ފުރަތަމަ ބުރު ނުވަތަ އޮންލައިން ވޯޓިން ބުރު އޮންނާނީ އަންނަ އާދިއްތައިން ބުރާސްފައްޗަށެވެ. ސައްހަ ހުރިހާ އެންޓްރީއެއް އައިކެއާގެ ރަސްމީ ފޭސްބުކް ޕޭޖަށް އަޕްލޯޑް ކުރެވޭއިރު، އާންމުންނަށް ވޯޓުލެވޭނީ އެމީހުން އެންމެ ގަޔާވާ އާޓްވޯކްތައް “ލައިކް” ކޮށްގެންނެވެ. ފައިނަލް އެގްޒިބިޝަނަށް ޝޯޓްލިސްޓް ކުރެވޭނީ އެންމެ ގިނަ ވޯޓު ލިބޭ ފަރާތްތަކެވެ.
ދެވަނަ ބުރުގައި ނުވަތަ މައުރަޒު އަދި ފައިނަލް ވޯޓިން ބުރުގައި ޝޯޓްލިސްޓް ކުރެވޭ ހުރިހާ އާޓްވޯކްތަކެއް މާލޭގެ އާޓިފިޝަލް ބީޗުގައި ބާއްވާ ވޯލްޑް ސައިޓް ޑޭ އާންމު އިވެންޓުގައި ދައްކާލާނެއެވެ. މައުރަޒަށް ޒިޔާރަތްކުރާ މީހުންނަށް އަނެއްކާވެސް ވޯޓުލުމުގެ ފުރުސަތު ލިބޭއިރު، ގަދަ ތިން ވަނަ ހޯދާ ކުދިންގެ ނަންތައް އެ ދުވަހު ލައިވް ސްޓޭޖު މަތިން އިއުލާންކުރާނެއެވެ.
