ތިނަދޫގައި ނުރައްކާތެރި ލޯންޗު އެކްސިޑެންޓެއް ހިނގައި، 4 މީހަކަށް އަނިޔާވެއްޖެއެވެ.
ފުލުހުން ވިދާޅުވީ ތިނަދޫ ސިޓީ ފެރީ ޓާމިނަލް ޖެޓީއަށް ކައިރި ކުރި ލޯންޗެއް ކޮންޓްރޯލް ނުވެގޮސް ޖެޓީގައި ޖެހި އެކްސިޑެންޓް ވެފައިވާކަމުގެ މައުލޫމާތު މިއަދު މެންދުރު 01:50 އެހާކަންހާއިރު ފުލުހުންނަށް ލިބިފައިވާކަމަށެވެ.
އެލޯންޗްގައި ތިބީ 3 އަންހެނުންނާއި، 1 އަހަރުގެ ތުއްތު ކުއްޖެއްގެ އިތުރުން ލޯންޗްގެ ކެޕްޓަނާއި، ފަޅުވެރިޔާ ހިމެނޭހެން ޖުމްލަ 6 މީހުންކަމަށް ފުލުހުން މަޢުލޫމާތުދެއްވިއެވެ.
ފުލުހުން ވިދާޅުވީ މި އެކްސިޑެންޓްގައި ލޯންޗުގައި ތިބި 2 ފަސިންޖަރަކަށާއި، ކެޕްޓަނާއި، ފަޅުވެރިޔާއަށް އަނިޔާވެފައިވާކަމަށެވެ. އަނިޔާވެފައިވަނީ ކެޕްޓަނާއި ފަޅުވެރިޔާގެ އިތުރުން 2 އަންހެނަކަށެވެ. އެ މީހުންނަށް ޑރ. އަބްދުލް ސަމަދު މެމޯރިއަލް ހޮސްޕިޓަލުގައި އަންނަނީ ފަރުވާދެމުންނެވެ.
މި މައްސަަލަ ފުލުހުން ގެންދަނީ ތަހުގީގު ކުރަމުންނެވެ.
