ޑިޖިޓަލް ދުނިޔެއެއްގައި ދިރިއުޅޭ އަހަރެމެންގެ ހުރިހާ ކަމެއްވެސް މިފަހަކަށް އައިސް ގުޅިފައިހުންނަނީ އޮންލައިން އެކިއެކި އެޕްސް ތަކާއި ތަފާތު އެކިކަހަލަ އެފަދަ ޕްލެޓްފޯމްތަކާއެވެ. އެންމެ ރަނގަޅަށް ދިރިއުޅުމުގެ ކަންކަން ބައްޓަންކުރުމުން ފެށިގެން އުނގެނުމާއި އުނގަންނައިދިނުމާއި ސިއްޙަތު ސަލާމަތުން ހުރުމަށާއި ވިޔަފާރިފަދަ ކޮންމެ ކަމެއްގައި މިއަދު ލެބިގެން ދެވެނީ އޮންލައިން ޕްލެޓްފޯމުތަކުގައި ދައްކާ ވާހަކަ ތަކަށެވެ. އެހެންނަމަވެސް ނޭނގޭ ކަމަކީ މިފަދަ ގިނަ އެޕްލިކޭޝަންތަކަށް ފަސްޖެހުމެއް އަދި ފިކުރެއް ނެތި އަހަރެމެން ދޫކޮށްލާ ޒާތީ މައުލޫމާތު ތަކާއި އެއިން ނިކުންނާނެ ނަތީޖާއާއި މެދެވެ.
ގިނަ އަންހެންވެރިން ބޭނުންކުރާ އެޕްލިކޭޝަނެއް ކަމުގައިވާ މައްސަރު ކަންތައްތަކާއި ބެހޭ ތަފާތު އެޕްތަކަކީ ކިހާވަރަކަށް ރައްކާތެރި އެޕްތަކެއްތޯ މިހާތަނަށް ބަލާލެވުނު ހެއްޔެވެ؟ މި އެޕްތައް މައިގަނޑު ގޮތެއްގައި އަންހެނުން ބޭނުންކުރަނީ އެމީހުންގެ މައްސަރުދުވަސް ނުވަތަ ޕީރިއަޑް ދުވަސްވަރުގެ ދައުރާއި ދަރިމައިވުމުގެ ދައުރާއި އަޅައިބަލައި އެކަންކަން ދެނެގަނެ ހޭލުންތެރިވުމަށެވެ. ހަމަ އެހެންމެ މި އެޕްތަކުން ދަރިމައިވުން ކޮންޓްރޯލް ކޮންޓްރޯލްކުރުމާއި ނަފްސާނީ ދުޅަހެޔޮކަމާ ގުޅޭ މަޢުލޫމާތުވެސް ފޯރުކޮށްދެއެވެ.
ޑިޖިޓަލް ޙައްޤުތަކާބެހޭ ޖަމްޢިއްޔާއެއް ކަމުގައިވާ ޕްރައިވަސީ އިންޓަރނޭޝަނަލްއިން ކުރިއަށް ގެންދިޔަ ދިރާސާއަކުން ދެއްކި ނަތީޖާ އަކީ އެޕްބޭނުންކުރާ އަންހެންވެރިންނަށް އުފާވެރި ޚަބަރެއްނޫނެވެ. ސަބަބަކީ އެޕް ތައްޔާރުކުރާ ފަރާތްތަކާއި ފޭސްބުކް ފަދަ ތިންވަނަ ފަރާތްތަކުން ފައިދާއެއް ހޯދުމަށްޓަކައި ބޭނުންކުރާ މީހުންގެ ޕްރައިވަސީ ނިގުޅައިގަންނަ މިންވަރު ހާމަވެގެން ދިއުމެވެ.
އިންޓަނެޓް ޕްލެޓްފޯމްތަކުގައި އެންމެ ނާޒުކު ބައެއްގެ ގޮތުގައި ހިމެނޭ އަންހެނުންނަށް، އެމީހުންގެ އައިޑެންޓިޓީއާއި ރައްކާތެރިކަމާއި ޕްރައިވަސީއަށް ކުރިމަތިވާ އިތުރު ނުރައްކާތައް މި ދިރާސާއިން ހާމަވެގެން ދިޔައެވެ.
މައްސަރުކަންތައް ދައުރުވާގޮތް ބަލާ ދުނިޔޭގައި އެންމެ މަޤްބޫލު އެޕްތަކުގެ ތެރެއިން ބައެއް އެޕްތަކާ ގުޅޭގޮތުން ޕްރައިވަސީ އިންޓަރނޭޝަނަލްއިން ކުރި ތަޙްޤީޤުން ދައްކައިދޭ ގޮތުގައި ގިނަ އެޕްތަކުން ބޭނުންކުރާ މީހުންގެ މަޢުލޫމާތު ފޭސްބުކްއާއި އެހެނިހެން ތިންވަނަ ފަރާތްތަކާ ޙިއްޞާކުރެއެވެ. މި މަޢުލޫމާތު ބަދަލުކުރެވެނީ ގިނަ އެޕް ތައްޔާރުކުރާ ފަރާތްތަކުން ބޭނުންކުރާ ފޭސްބުކްގެ ސޮފްޓްވެއަރ ޑިވެލޮޕަރ ކިޓް (އެސްޑީކޭ) މެދުވެރިކޮށެވެ.
މިފަދަ އެޕްތަކުގެ ތެރެއިން ފާހަގަކޮށްލެވޭ އެއް އެޕަކީ ޕްލާކަލް ޓެކްގެ މާޔާއެވެ. މި އެޕް ގޫގުލް ޕްލޭގައި 5 މިލިއަނަށްވުރެ ގިނައިން ޑައުންލޯޑު ކުރެވިފައިވެއެވެ.
މާޔާއިން ބޭނުންކުރާ މީހުންނަށް އެމީހުންގެ މައްސަރު ދުވަސްވަރުގެ ދައުރުގައި ކުރިމަތިވާ “އަލާމާތްތައް” ލިޔުމުގެ ފުރުޞަތު ދެއެވެ. މީގެ ތެރޭގައި މޫނުގައި ނަގާ އޮށާޅައާއި ހަންގަނޑަށް އަންނަ ބަދަލުތަކާއި އޭގެ ސަބަބުން ކުރިމަތިވާ މައްސަލަތަކާއި މޫޑް ބަދަލުވުމާއި ލޭގެ ޕްރެޝަރ މަތިވުން ފަދަ ކަންކަން ހިމެނެއެވެ.
މި ހުރިހާ މަޢުލޫމާތަކީ ފޭސްބުކް އަދި އެހެނިހެން ތިންވަނަ ފަރާތްތަކަށް ވަރަށް އަގުހުރި މަޢުލޫމާތެވެ. އެފަރާތްތަކަށް މި މަޢުލޫމާތު ބޭނުންކޮށްގެން ބޭނުންކުރާ ފަރާތްތަކުގެ މޫޑު ނުވަތަ އަމިއްލަ ޝައުޤުތަކަށް ބިނާކޮށް ވިޔަފާރި ކުރާމީހުންނަށް ޚާއްޞަ އިޝްތިހާރުތައް ތައްޔާރުކުރެއެވެ.
މާޔާ އެޕް ބޭނުންކުރާ ފަރާތްތަކުން އެމީހުންގެ މަޢުލޫމާތު ބޭނުންކުރުމަށް ހުއްދަ ދީފައިވީނަމަވެސް، އެމީހުންގެ އަމިއްލަ މަޢުލޫމާތު މިގޮތަށް އެމީހުންނާ ދެކޮޅަށް ބޭނުންކުރެވޭކަމެއް ގިނަ މީހުންނަށް އެނގިފައި ނުވާނެއެވެ.
ޑިޖިޓަލް ޕްރައިވަސީގައި ޖިންސުގެ ތަފާތު މި އެޕްތައް ބޭނުންކުރާމީހުންގެ މަޢުލޫމާތު އެހެންފަރާތްތަކުން ބޭނުންކުރުމުން އެނގިގެންދަނީ އެފަދަ ކުންފުނިތަކަށް އަޅުގަނޑުމެންގެ އެންމެ އަމިއްލަ، ޒާތީ މަޢުލޫމާތު ލިބިގަތުމާއި އެއިން ފައިދާ ހޯދުމަކީ ކިހާ ފަސޭހަކަމެއް ކަމެވެ. އަދި އަހަރެމެންނަށް ނޭނގި ވިޔަފާރިތަކުން އަހަރެމެންގެ އަމިއްލަ މައުލޫމާތުތަކެއް ބޭނުންކުރާ ކަމެވެ.
މި ހޯދުންތަކުގެ މުހިންމުކަން އިތުރަށް ބޮޑުވެގެންދަނީ ޑިޖިޓަލް ޕްރައިވަސީގައި ފާހަގަކުރެވޭ “ޖިންސުގެ ތަފާތު” އާ ގުޅުވާލުމުންނެވެ. ޑިޖިޓަލް ޕްރައިވަސީއާ މެދު ފިރިހެނުންނަށް ވުރެ ބޮޑަށް އަންހެނުން ކަންބޮޑުވި ނަމަވެސް ދިރާސާތަކުން ދައްކާގޮތުގައި ޓެކްނޮލޮޖީއާއި، ޑޭޓާއާއި، އިންޓަރފޭސް ޑިޒައިންގެ ސަބަބުން ކުރިމަތިވެދާނެ ނުރައްކާތަކާ މެދު އަންހެނުންގެ ހޭލުންތެރިކަން އަދިވެސް ދަށެވެ.
އެހެންކަމުން އަމިއްލަ ރައްކާތެރިކަމަށްޓަކައި ފިޔަވަޅު އެޅުން އަންހެނުންނަށް މިވަނީ މުހިއްމުކަމަކަށް ވެފައެވެ. އަދި އަމިއްލަ ރައްކާތެރިކަމަށްޓަކައި އަޅުގަނޑުމެންނަށް އެޅޭނެ ފިޔަވަޅުތައް ވެސް އެބަހުއްޓެވެ.
އެގޮތުން މައްސަރުކަންތައް ތަކުގެ ސައިކަލް ބެލެހެއްޓުމަށް އެޕެއް ބޭނުންކުރުމުގެ ފައިދާ ލިބޭނަމަ، މަޢުލޫމާތު އެކަށީގެންވާ ގޮތެއްގައި ބަލަހައްޓާ އެޕަކަށް ބަދަލުކުރުން މުހިންމެވެ. މިސާލަކަށް “ކްލޫ” ފަދަ އެޕެކެވެ. އެހެނިހެން އެޕްތަކާ ގުޅޭގޮތުން ވެސް، އެ އެޕްތަކުގެ ޕްރައިވަސީ ޕޮލިސީ ބަލައި، އެއިން ރެކޯޑުކުރަނީ ކޮން މައުލޫމާތުތަކެއްތޯ އާއި އަދި އެ މަޢުލޫމާތު ހިއްސާކުރަނީ ކޮން ފަރާތަކާތޯ ބެލުން މުހިންމެވެ.
ހަމައެހެންމެ އިތުބާރުހުރި ވީޕީއެން އެއް ފަދަ ޕްރައިވަސީ ޓޫލްތަކަށް އިންވެސްޓްކުރުމަކީ ވެސް، ނެޓްވޯކް މެދުވެރިކޮށް އެއްވެސް މީހަކު ޖާސޫސްކުރުމުން ރައްކާތެރިވުމަށް އެޅިދާނެ ފިޔަވަޅެކެވެ.
ޓެކްނޮލޮޖީގެ ދާއިރާ އަދިވެސް ބައްޓަންވެފައި އޮތީ ފިރިހެނުންނަށް އަމާޒުކޮށް، ފިރިހެނުން ކޮންޓްރޯލްކުރާ އެއްޗެއްގެ ގޮތުގައިިކަމުން އޮންލައިން ޕްލެޓްފޯމްތައް ބޭނުންކުރާ އަންހެނުން އެމީހުންގެ އަމިއްލަ ޒާތީ ކަންތައްތައް ޖެހިލުމެއްނެތި ހިއްސާކުރުމުން ދުރުހެލިވުމަކީ ރައްކާތެރިކަމުގެ ގޮތުން އެޅޭނެ އެންމެ މުހިއްމު އެއްފިޔަވަޅެވެ!
