އިއްޔެ މާލެއަށް ބޯކޮށް ވާރޭ ވެހުމުގެ ސަބަބުން ކުނި ނުނެގި ހުރި ސަރަހައްދުތަކުން މިއަދު ހެނދުނުން ފެށިގެން ކުނި ނަގަމުން އަންނަކަމަށް ވެމްކޯ އިން ބުނެފިއެވެ.
ވެމްކޯ އިން ބުނީ ވިއްސާރައިގެ ސަބަބުން ބޮޑު ބައެއްގައި ފެންބޮޑުވެ، ގެތަކަށް ފެންވަދެ ބައެއް ސަރަހައްދުތަކުގެ މަގުތައް ބަންދުކޮށްފައިވާ ކަމަށެވެ. އެހެންކަމުން ބައެއް ގޭބިސީތަކުންނާއި، ވިޔަފާރިތަކުން ކުނި ނަގައި، ހިދުމަތް ދިނުމުގައި ދަތިތަކަކާ ކުރިމަތިވެފައިވާ ކަމަށް އެ ކުންފުނިން ވަނީ ބުނެފައެވެ.
މިހާރު ކުރަމުންދާ ވިއްސާރައިގައި މާލެއާއި އަތޮޅުތެރޭގެ ގިނަ ރަށްރަށުގައި ފެންބޮޑުވެ ގެއްލުންތައް ވެފައިވާއިރު އާންމު ދިރިއުޅުމަށްވެސް ވަނީ ބުރޫއަރާފައެވެ. އެގޮތުން ބޯކޮށް ވާރޭވެހި އުދައެރުމުގެ ސަބަބުން ހިފާ ގެންގުޅޭ ތަކެތި ހަލާކުވެ، ބައެއް ފަރާތްތަކަށް ވަނީ ވަގުތީ ބޯހިޔާވަހިކަންވެސް ފޯރުކޮށްދީފައެވެ.
