ރާއްޖޭގެ ތާރީޚުގައި މިހާތަނަށް އެންމެ ގިނަ މުދާ އެތެރެކޮށްފައިވަނީ 2024 ވަަނަ އަހަރު ކަމަށް މޯލްޑިވްސް ޕޯޓްސް ލިމިޓެޑްގެ ޗީފް އެގްޒެކެޓިވް އޮފިސަރ މުޙައްމަދު ވަޖީހު އިބްރާހިމް ވިދާޅުވެއްޖެއެވެ.
އެމްޕީއެލްގެ ތަފާސްހިސާބުތަކުން ދައްކާގޮތުގައި 2024 ވަނަ އަހަރު 66,638 ޓީއީޔޫސް ކޮންޓެއިނަރައިޒް ކާގޯ އެތެރެކޮށްފައިވާއިރު، 150,692 ފްރެއިޓް ޓަންސް ޖެނެރަލް ކާގޯ ވަނީ އެތެރެކޮށްފައެވެ. މިއީ 2023 ވަނަ އަހަރާ އަޅާބަލާއިރު ކޮންޓެއިނަރައިޒް ކާގޯއިން 7 އިންސައްތަ އަދި ޖެނެރަލް ކާގޯއިން 29 އިންސައްތަ އިތުރުވުމެކެވެ. ޖެނެރަލް ކާގޯއަކީ ކޮންޓެއިނަރުގައި ބަންދުކޮށްގެންނާއި، ނުކުށް ގެންނަ ލުއި މުދަލެވެ.
ތަފާސްހިސާބުތަކަށް ބަލާއިރު މިދިޔަ އަހަރާ އެންމެ ގާތަށް ކޮންޓެއިނަރު ރާއްޖެ އެތެރެކޮށްފައިވަނީ 2018 ވަނަ އަހަރުއެވެ. އެއީ 63،002 ކޮންޓެއިނަރެވެ. އަދި އެ އަހަރު އެތެރެކޮށްފައިވަނީ 123،669 ފްރެއިޓް ޓަނުގެ ކާގޯއެވެ.
ސޯޝަލްމީޑިއާގައި ކުރެއްވި ޕޯސްޓެއްގައި ވަޖީހު ވިދާޅުވި ގޮތުގައި މިދިޔަ އެމްޑީޕީގެ ސަރުކާރުގައި ހޭދަވި 5 އަހަރުގެ ތަފާސްހިސާބަށް ބަލާއިރު، ކޮންޓެއިނަރު ރާއްޖެއަށް އެތެރެކުރެވޭ މިންވަރުހުރީ އެވްރެޖް މިންވަރެއްގައި ކަމަށެވެ. އެހެންކަމުން ޤައުމުގެ އިޤުތިޞާދަށް މާބޮޑު ކުރިއެރުމެއް މިދިޔަ ސަރުކާރުގައި އައިސްފައި ނުވާކަމަށް ވަޖީހު ވިދާޅުވިއެވެ. ނަމަވެސް، ރައީސް ޑރ. މުޙައްމަދު މުޢިއްޒުގެ ވެރިކަމުގެ ފުރަތަމަ އަހަރުވެސް ރާއްޖޭގެ އިޤްތިޞާދަށް ދިރުން އައިސްފައިވާކަން މި ތަފާސްހިސާބުތަކުން ދޭހަވާ ކަމަށް ވަޖީހު ވިދާޅުވިއެވެ.
ވަޖީހު ވިދާޅުވީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ ގިނަ ޕްރޮޖެކުޓުތަކެއް މިއަހަރު ފެށިގެން ދިއުމުން ރާއްޖޭގެ އިޤުތިޞާދަށް ބޮޑެތި ކުރިއެރުންތަކެއް މިއަހަރުވެސް ލިބޭނެ ކަމަށެވެ.
ރާއްޖެއަށް އެތެރެކުރާ ކޮންޓެއިނަރުގެ އަދަދު އިތުރުވަމުންދާތީ، ކޮންޓެއިނަރު ބެހެއްޓޭނެ ޖާގަ އިތުރުކުރުމަށް މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ސަރުކާރުން ވަނީ ފަށާފައެވެ. މިހާރު މާލޭ ވިޔަފާރި ބަނދަރުގައި އެއްފަހަރާ ބެހެއްޓޭނީ 2,200 ކޮންޓެއިނަރެވެ. ނަމަވެސް، ބަނދަރު ފުރެމުންދާތީ އެކި ބާވަތްތަކުގެ ކާގޯ ހިމެނޭ ކޮންޓެއިނަރު ބަނދަރުގައި ބެހެއްޓޭނެ ދުވަސްތަކުގެ އަދަދު މަދުކުރުމަށް ނިންމާފައިވާ ކަމަށް ވަޖީހު ވިދާޅުވިއެވެ.
