ކޮންމެ ހަފްތާއަކުވެސް ހިތްގައިމު ޗުއްޓީއެއްގެ ފުރުސަތު ލިބޭ “ވޯލްޑްސް ބިގެސްޓް ގިވްއަވޭ” މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ފަށައިފިއެވެ.
އެމްއެމްޕީއާރްސީ އިން ބުނީ މި މުބާރާތުގެ މައިގަނޑު މަގުސަދަކީ ސޯޝަލް މީޑިއާގެ ޒަރިއްޔާއިން ބައިނަލްއަގުވާމީ ފަރާތްކުގެ ބައިވެރިވުމާއެކު ރާއްޖެއަށް ގިނަ ފަތުރުވެރިން އައުމަށް ޝައުގުވެރިކުރުވުން ކަމަށެވެ. މި މުބާރާތުގެ ސަބަބުން ފަތުރުވެރިންންނަށް ރާއްޖޭގެ ތަފާތު ހިތްގައިމުކަން ދެނެގަނެވި، ރާއްޖެ އަކީ އަހަރުގެ ކޮންމެއިރަކުވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރު ވެގެން ދާނެ ކަމަށެވެ.
އެމްއެމްޕީއާރްސީން ބުނީ މި މުބާރާތް ބާއްވާނީ ސޯޝަލް މީޑިއާ މެދުވެރިކޮށް ކޮންމެ މަހަކު ކަމަށެވެ. މި މުބާރާތްތަކުގެ ނަސީބުވެރި ފަރާތްތަކަށް ކޮންމެ ހަފްތާއަކުވެސް ހިތްގައިމު ޗުއްޓީއެއްގެ ފުރުސަތު ލިބިގެންދާނެ ކަމަށް އެމްއެމްޕީއާރްސީ އިން ވަނީ ބުނެފައެވެ. އެއާއެކު އެމްއެމްޕީއާރްސީ އިން ބުނީ ޖެނުއަރީ މަހުގެ އެއްވަނަ ދުވަހުން ފެށިގެން 2025 ވަނަ އަހަރުގެ ކޮންމެ ހަފުތާއަކަށް އެއް ޗުއްޓީއާއެކު ޖުމްލަ 52 ޗުއްޓީ ދިނުމަށް ހަމަޖެހިފައިވާ ކަަމަށެވެ.
މި މުބާރާތުގައި ރާއްޖޭގެ ރީތި ގޮނޑުދޮށްތަކާއި ސާފު މޫދާއި، ގުދުރަތީ ރީތިކަމުން ފެށިގެން ރާއްޖޭގެ މުއްސަނދި ސަގާފަތާއި ކަނޑުގެ ދިރުންތައް ފަދަ އެކިއެކި ކަންކަމަށް އަލިއަޅުވާލާނެކަން ފާހަގަކޮށް އެމްއެމްޕީއާރްސީ އިން ބުނީ ރޮމޭންސް، ލަގްޒަރީ، ފެމިލީ، ޑައިވިން އަދި އެހެނިހެން ހިތްގައިމު ތަފާތު ސެގްމެންޓްތަކަށްވެސް އަލިއަޅުވާލާނެ ކަމަށެވެ.
