ގާނޫނު އަސާސީއަށް ގެނައި ބަދަލުތަކުގެ ސަބަބުން ރައްޔިތުންގެ ބާރުވެރިކަން އިތުރުކުރެވިފައިވާކަން، ސިޔާސީ ތައައްސަބުތަކުން އެއްކިބާވެވަޑައިގެން ވިސްނާވަޑައިގެންފި ކޮންމެ ރައްޔިތަކަށްވެސް ފަހުމުވެވަޑައިގަންނަވާނޭކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އަރި އަތޮޅާއި މާލެ އަތޮޅުގެ ބައެއް ރަށްރަށަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން، އަރި އަތޮޅު އުތުރުބުރީ މަތިވެރީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ގާނޫނު އަސާސީގެ މަގްސަދަކީ، ދައުލަތުގެ ސިޔާދަތީ ބާރާއި އެ ބާރު ހިނގާ ސަރަޙައްދު އިޢުލާންކޮށް ކަނޑައެޅުމާއި، ރައްޔިތުންގެ ބާރު ކަނޑައެޅުމާއި، ރައްޔިތުންގެ ހައްގުތަކާއި ޒިންމާތައް ކަނޑައެޅުމާއި، ދައުލަތުގެ ގާނޫނީ ވެރިކަން ހިންގުމުގެ ނިޒާމާއި ތަރުތީބާއި އިންތިޒާމުތައް ކަނޑައެޅުންކަމުގައި ރައީސް ވިދާޅުވިއެވެ. އަދި ގާނޫނު އަސާސީއަށް ބަދަލުގެނެސްފައިވަނީ، ރައްޔިތުންގެ ދިފާއުގައި ކަމުގައި އެމަނިކުފާނު ވިދާޅުވިއެވެ.
އިތުރަށް ރައީސް ވިދާޅުވީ ގާނޫނު އަސާސީއަށް ގެނައި އިސްލާޙުތަކުގެ މަޤްޞަދު، ރައްޔިތުންނާ ހިއްސާކުރައްވާފައެވެ. އެގޮތުން، ރާއްޖޭގެ ހާއްސަ އިގްތިސާދީ ސަރަޙައްދުގެ އެންމެ އަކަ އިންޗިއަކަށްވެސް ބަދަލެއް ގެނެވޭނީ، ރައްޔިތުންގެ މަޖިލީހުގެ އަޣުލަބިއްޔަތުގެ ހަތަރުބައިކުޅަ ތިންބައިގެ ވޯޓުގެ އިތުރުން، 143،332 ރައްޔިތުންގެ ރުހުމާވެސް އެކުގައިކަމަށް އެމަނިކުފާނު ވިދާޅުވިއެވެ.
ގާނޫނު އަސާސީގެ 251 ވަނަ މާއްދާއަށް ގެނައި ބަދަލާއެކު، ދިވެހިރާއްޖޭގައި އަސްކަރީ އެންމެ ބޫޓު ޖޯޑެއް ހަރަކާތްތެރިވުމަށްވެސް، ރައްޔިތުންގެ މަޖިލީހުގެ އަޣުލަބިއްޔަތު ހޯދަންޖެހޭނެކަން އެމަނިކުފާނު ފާހަގަކުރެއްވިއެވެ. އަދި، އެއްބަސްވުމެއްގެ ދަށުން ބާއްވާ އަސްކަރީ ތަމްރީނުތަކުގައި ބައިވެރިވުން ފިޔަވައި، ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެން މެނުވީ، އަސްކަރީ ބޭނުމަކަށް، ދިވެހިރާއްޖޭގެ ސަރަޙައްދުގައި ބޭރުގެ ސިފައިން އެއްވެސް ސިފައެއްގައި ޢަމަލީގޮތުން ޙަރަކާތްތެރިވުމަށް ހުއްދަ ދިނުންވެސް ވަނީ މަނާކޮށްފައެވެ.
ރައްޔިތުންގެ މަޖިލީހުގެ މެންބަރަކަށް ވުމުގެ ޝަރުތިތަކަށް ގެނައި ބަދަލުންވެސް ހިމާޔަތްކޮށްދެނީ ރައްޔިތުންގެ ހައްގުތައްކަމަށް ރައީސް ވިދާޅުވިއެވެ. މެމްބަރުން އިންތިޚާބުގައި ވާދަކުރަނީ ވަކި ފިކުރެއް ނުވަތަ ޕާޓީއެއް ތަމްސީލުކުރާ މީހެއްގެ ގޮތުންކަމަށާއި، އެހެންކަމުން، އިންތިޚާބުވާ މެންބަރާ ދާއިރާގެ ރައްޔިތުންނާ ދެމެދު ވަނީ އަހުދެއްކަން އެމަނިކުފާނު ފާހަގަކުރެއްވިއެވެ. އެ ޢަހުދުގައި މެންބަރު އެއްބަސްވަނީ ޤާނޫނު އަސާސީގައި ބުނާ މަސްއޫލިއްޔަތު އަދާކުރުމަށްކަމަށާއި، ޤާނޫނު އަސާސީއަށް ގެނައި އިޞްލާޙުގެ ސަބަބުން މެންބަރުން ވީ އަޙުދު ހިމާޔަތްކުރެވިގެންދާނެކަމަށް އެމަނިކުފާނު ވިދާޅުވިއެވެ.
ޤާނޫނު އަސާސީއަށް އިސްލާހްއް ގެނައުމުގެ ކުރިން ރައްޔިތުންގެ ވޯޓުން ފާސްކުރަންޖެހޭ ހާލަތްތަކަށް ރިޢާޔަތްކުރައްވަމުން، ފެންނަ ނުފެންނަ ވޯޓާމެދު ގޮތް ނިންމުމަށް، މަދު މީސްކޮޅެއްގެ މުށުތެރޭގައި އޮތް ބާރު، ގާނޫނު އަސާސީއަށް ގެނައި އިޞްލާޙާއެކު ރައްޔިތުންގެ އަތްމައްޗަށް ދޫކޮށްލެވިފައިވާކަން އެމަނިކުފާނު ފާހަގަކުރެއްވިއެވެ. މީގެ އިތުރުން، ރައީސްގެ މަސްއޫލިއްޔަތަށް ގެނައި ބަދަލަކީވެސް، ދިގު ރާސްތާގެ އަދި ކުރު ރާސްތާގެވެސް ތަރައްގީގެ ޕްލޭންތައް ހެދުމުގެ މަސްއޫލިއްޔަތު ރައީސުލްޖުމްހޫރިއްޔާއަށް މަތިކުރެވިފައި ނުވާތީ، އެކަމަށް ގެނައި އިސްލާހެއްކަން އެ މަނިކުފާނު ފާހަގަކުރެއްވިއެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއަށް 6 ވަނަ އިޞްލާޙު ގެނައުމުގެ ބިލު، ރައީސުލްޖުމްހޫރިއްޔާ ތަސްދީގުކުރައްވާފައިވަނީ 20 ނޮވެންބަރު 2024 ގައެވެ.
