ޑަބްލިއުޑީސީ ބެޑްމިންޓަން ފިއެސްޓާ 2024 ގެ ނަމުގައި އައްޑޫސިޓީގައި ބާއްވާ ބެޑްމިންޓަން މުބާރާތް ހުކުރު ދުވަހު ފަށައިފިއެވެ.
މުބާރާތުގެ ފުރަތަމަ ދުވަހު ކުރިޔަށްގެންގޮސްފައި ވަނީ 2 މެޗެވެ. އައްޑޫސިޓީ ބެޑްމިންޓަން އެރީނާ ގައި ކުރިއަށް ދާ މިމުބާރާތުގެ ފުރަތަމަ މެޗުގައި ބައްދަލު ކުރީ ޓީމް މަލާ އާއި ބޭރުމަތި ސްޕޯޓްސް ކްލަބެވެ. 22 ފޮއިންޓާއެކު އެމެޗު ކާމިޔާބު ކުރީ ބޭރުމަތި ސްޕޯޓްސް ކްލަބެވެ.
މިމުބާރާތުގެ ދެވަނަ މެޗްގައި ބައްދަލު ކުރީ ޓްރިޑީ ސްޕޯޓްސް އެކަޑަމީ އާއި ރޮކެޓް ރޯޔަލްސް އެވެ. 24 ޕޮއިންޓް ހޯދައިގެން މިމެޗް ކާމިޔާބު ކުރީ ޓްރިޑީ ސްޕޯޓްސް އެކަޑަމީއެވެ. ފޯރިގަދަ ކުޅުމެއް ފެނިގެންދިޔަ މިމެޗް، ޓްރީޑީ އިން ހޯދީ ކުޅުނު 7 ޓައިގެ ތެރެއިން 6 ޓައި ކާމިޔާބު ކޮށްގެންނެވެ.
ހޮނިހިރު ދުވަހުވެސް ވަނީ މިމުބާރާތުގެ ކުޅުން ކުރިއަށް ގެންގޮސްފައެވެ. ހޮނިހިރު ދުވަހުގެ ކުޅުން ފެށުނީ 19.00 ގައި މުބާރާތް ފެށުމުގެ ގޮތުން ބޭއްވި ޚާއްސަ ރަސްމިއްޔާތަށް ފަހުއެވެ. އެގޮތުން ކުޅުނު މެޗްގައި ބައްދަލުކުރީ ޓީމް މަލާ އާއި ޝަޓްލް ފައިޓާސްއެވެ.
މިމުބާރާތުގެ 1 މެޗް އާދީއްތަ ދުވަހުވެސް ކުޅޭނެއެވެ. އާދީއްތަ ދުވަހު ކުޅޭ މެޗްގައި ބައްދަލުކުރާނީ ބޭރުމަތި ސްޕޯޓްސް ކްލަބް އާއި ޝަޓްލް ފައިޓާސްއެވެ.
ޑަބްލިއުޑީސީ ބެޑްމިންޓަން ފިއެސްޓާ ގައި ޖުމްލަ 40 ކުޅުންތެރިން ވާދަކުރެއެވެ. އެއީ ފިރިހެން 20 ކުޅުންތެރިންނާއި އަންހެން 20 ކުޅުންތެރިންނެވެ. މިއީ އައްޑޫސިޓީގެ އަންހެނުންނަށް ބެޑްމިންޓަންގެ ރޮނގުން ވާދަވެރި މާޙައުލެއް ހޯދައިދިނުމާއެކު، އައްޑޫގައި ބެޑްމިންޓަންގެ މަޤްބޫލުކަން އިތުރުކޮށް، ކުޅިވަރުގެ ރޫޙާއި އެއްގޮތަށް މިކުޅިވަރު ކުޅުމަށް ހިތްވަރުދީ، ކުޅުންތެރިންގެ ފެންވަރު ވަޒަންކޮށް، ހުނަރު ތަރައްޤީކޮށްދީގެން މިކުޅިވަރަށް ޝައުގު އުފައްދައި، ކުޅުންތެރިންގެ މެދުގައި އެކުވެރިކަމުގެ ރޫޙު އާލާ ކުރުމާއެކު އިޖުތިމާޢީ ގުޅުން ބަދަހިކުރުމުގެ މަޤްޞަދުގައި ޑަބްލިއުޑީސީން ބާއްވާ މުބާރާތެކެވެ.
މި މުބާރާތުގެ ފައިނަލް މެޗް ކުޅުމަށް ހަމަޖެހިފައިވަނީ މިމަހުގެ 12 ވަނަ ދުވަހުއެވެ. މިމުބާރާތް ހިނގަމުންދަނީ 2 ގްރޫޕަކަށް ބަހާލައިގެންނެވެ. އެގޮތުން ފުރަތަމަ ގްރޫޕުން މޮޅުވާ ދެޓީމެއް ސެމީއަށް ދާނެއެވެ. ދެވަނަ ސެމީގައި އެއްކޮޅުން ބައްދަލުކުރާނީ ދެވަނަ ގްރޫޕްގެ ފުރަތަމަ މެޗުން މޮޅުވާ ޓީމެވެ. މި މެޗްގައި އަނެއްކޮޅުން ވާދަކުރާނީ ދެވަނަ ގްރޫޕުން ބަލިވާ ޓީމާއި ފުރަތަމަ ގްރޫޕުން ތިންވަނަ އަށް ދާ ޓީމް ކުޅެގެން މޮޅުވާ ޓީމެވެ.
މިމުބާރާތް ކުރިއަށްދާނީ ކޮންމެ މެޗެއްގައި 7 ޓައި ކުޅޭ ގޮތަށެވެ. އެއީ، ފިރިހެން ސިންގަލްސް، އަންހެން ސިންގަލްސް، ފިރިހެން ޑަބަލްސް1، އަންހެން ޑަބަލްސް1، އަދި ފިރިހެން ޑަބަލްސް2، އަންހެން ޑަބަލްސް2 އާއި މިކްސްޑް ޑަބަލްސްއެވެ.
ޑަބްލިއުޑީސީން މިމުބާރާތް ކުރިއަށް ގެންދަނީ ، ދޮންނާ ޓްރޭޑާސް އާއި އައްޑޫ ބެޑްމިންޓަން ކްލަބް ގުޅިގެންނެވެ. މިމުބާރާތުގެ ލައިވް ކަވަރޭޖް ޕާޓްނަރަކީ ވަގުތުންލައިވް އެވެ. އަދި މީޑިއާ ޕާޓްނަރަކީ އޭއޯނިއުސްއެވެ.
މި މުބާރާތުގެ މެޗްތައް “ވަގުތުންލައިވް” ގެ ފޭސްބުކްޕޭޖުން ލައިވްކުރަމުން ދެއެވެ.
