މުޅިން އަލަށް ޑަބްލިއުޑީސީ އިން މުޅި އައްޑުއަށް އަމާޒުކޮށްގެން ބޭއްވި ޑަބްލިއުޑީސީ ބެޑްމިންޓަން ފިއެސްޓާ 2024 ގެ ޗެންޕިއަންކަން ވާދަވެރި ކުޅުމަކަށްފަހު މަލާ ޓީމް ބަލިކޮށް ޓްރިޑީ ސްޕޯޓްސް އެކަޑަމީން ހޯދައިފިއެވެ.
ރޭ އައްޑޫ ބެޑްމިންޓަން އެރީނާގެ އެތެރޭ ކޯޓުގައި ކުޅުނު ފޯރިގަދަ މެޗަށްފަހު މުބާރާތް ނިންމުމުގެ ރަސްމިއްޔާތުވެސް ވަނީ ކުރިއަށް ގެންގޮސްފައެވެ. އެގޮތުން މިމުބާރާތުގެ ޗެމްޕިއަން ޓީމަށް 15000 ރުފިޔާގެ ފައިސާގެ އިނާމާއި ތައްޓާއި މެޑެލް ޙަވާލުކޮށްދެއްވީ، ކުޅިވަރުގެ ރޮނގުން އައްޑޫއަށް ގިނަގުނަ ޚިދުމަތްކޮށްދެއްވައި އަދި ޝަރަފްވެރިކަމުގެ ޤައުމީ އިނާމު ލިބިވަޑައިގެންފައިވާ ، އައްޑޫ ހޮރައިޒަން އެކަޑަމީގެ ބާނީ، ޙައްވާ ރާމިޒާއެވެ.
މިމުބާރާތުގެ ރަނަރަޕް ޓީމަކީ ޓީމް މަލާ އެވެ. ރަނަރަޕްޓީމަށް 7000 ރުފިޔާއާއި ވާދައިގެ ތަށްޓާއި މެޑަލް އަދި ހަނދާނީ ލިއުން ޙަވާލުކޮށްދެއްވީ ޑަބްލިއުޑީސީގެ ރައީސާ ނުސްރަތު ރަޝީދެވެ.
މިމުބާރާތުގެ 3 ވަނައަށް ހޮވިފައިވަނީ ބޭރުމަތި ސްޕޯޓްސް ކްލަބެވެ. އެކްލަބަށް 3000 ރުފިޔާގެ ފައިސާގެ އިނާމާއި މެޑަލް ހަވާލުކޮށްދެއްވީ މާމެންދޫ ދާއިރާގެ ކައުންސިލަރ ޑޮކްޓަރ އަދާލާ ރަޝީދެވެ.
ޑަބްލިއުޑީސީ ބެޑްމިންޓަން ފިއެސްޓާ 2024ގެ އޯގަނައިޒިން ޕާޓްނަރ އަދި ޓެކްނިކަން ލީޑަކީ އައްޑޫ ބެޑްމިންޓަން ކްލަބާއި ދޮންނާ ބުކްޝޮޕެވެ. މިދެފަރާތުންވަނީ މިފަދަ މުބާރާތެއް އައްޑޫސިޓީގައި ބާއްވައިދެއްވީތީ އެކަމުގެ އަގު ވަޒަންކުރުމުގެ ގޮތުން ޑަބްލިއުޑީސީއަށް، ޚާއްސަ ހަނދާނީ ފިލާއެއް އަރުވާފައެވެ. މިފިލާ ޑަބްލިއުޑީސީގެ ރައީސާ ނުސްރަތު އިބްރާހީމްއާއި ޙަވާލުކޮށްދެއްވީ އޭބީސީ ގެ ފައުންޑަރ އަދި ދޮންނާ ޓްރޭޑާސްގެ ވެރިޔާ ޙުސެއިން ރިޔާޒެވެ.
އައްޑޫސިޓީ ޑަބްލިއުޑީސީ ބެޑްމިންޓަން ފިއެސްޓާ އަކީ އައްޑޫސިޓީގެ އަންހެނުންނަށް ބެޑްމިންޓަންގެ ރޮނގުން ވާދަވެރި މާޙައުލެއް ހޯދައިދިނުމާއެކު، އައްޑޫގައި ބެޑްމިންޓަންގެ މަޤްބޫލުކަން އިތުރުކޮށް، ކުޅިވަރުގެ ރޫޙާއި އެއްގޮތަށް މިކުޅިވަރު ކުޅުމަށް ހިތްވަރުދީ، ކުޅުންތެރިންގެ ފެންވަރު ވަޒަންކޮށް، ހުނަރު ތަރައްޤީކޮށްދީގެން މިކުޅިވަރަށް ޝައުގު އުފައްދައި، ކުޅުންތެރިންގެ މެދުގައި އެކުވެރިކަމުގެ ރޫޙު އާލާ ކުރުމާއެކު އިޖުތިމާޢީ ގުޅުން ބަދަހިކުރުމުގެ މަޤްޞަދުގައި ޑަބްލިއުޑީސީން ބޭއްވި މުބާރާތެކެވެ.
ނޮވެންބަރ 8 އިން 12 ގެ ނިޔަލަށް ކުރިއަށް ދިޔަ މިމުބާރާތުގެ އޮންލައިން ނިއުސް ޕާޓްނަރަކީ އޭއޯ ނިއުސްއެވެ. އަދި ލައިވް ސްޓްރީމިން ޕާޓްނަރއަކީ ވަގުތުންލައިވްއެވެ. ވެނިއު ޕާޓްނަރގެ ގޮތުގައި ހިތަދޫ އިޖްތިމާޢީ މަރުކަޒް ހިމެނުނުއިރު، މިމުބާރާތުގެ ޑިޖިޓަލް ޕާޓްނަރަކީ ދިރާގު ސ.އޮޕަރޭޝަންސްއެވެ.
