ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މާލެ އަދި ވިލިމާލޭގެ މަގުތައް އަލުން ރަނގަޅު ފެންވަރަކަށް ތަރައްގީކުރުމުގެ މަޝްރޫއުގެ ދަށުން ކުރިއަށް ގެންދިއުމަށް ހަމަޖެހިފައިވާ މަގުތަކުގެ ސަރވޭކުރުމާއި ފީސިބިލިޓީ އެސެސްމަންޓް މަސައްކަތް ފަށައިފިއެވެ.
ކޮންސްޓްރަކްޝަން މިނިސްޓްރީގެ ޓެކްނިކަލް ޓީމާއި ޗައިނާގެ މާހިރުންގެ ޓީމާއެކު ރަސްމީކޮށް ކުރިއަށްދާ މި މަސައްކަތަކީ، މަޝްރޫއުގެ ޑިޒައިން އަދި ޕްލޭނިން މަރުހަލާތަކަށް މަގުފަހިކުރުމަށްޓަކައި ކުރެވޭ ފީސިބިލިޓީ ދިރާސާއެކެވެ.
މި ނޮވެމްބަރު މަހުގެ 21 ވަނަ ދުވަހާއި ހަމައަށް މި ދިރާސާ ކުރިއަށްގެންދިއުމަށް ހަމަޖެހިފައިވާއިރު މި މަޝްރޫއުގެ ދަށުން ކުރެވޭ މަސައްކަތްތަކުގެ ތެރޭގައި މާލޭގެ މަގުތަކުގެ ހަލަތު ދެނެގަތުމާއި، މަގުތަކުގެ ފެންވަރު ރަނގަޅުކުރުމަށް ބޭނުންވާ ކަންކަން ފާހަގަކުރުން ހިމެނެއެވެ. މީގެ އިތުރުން، މަގުތަކުގެ ޓްރެފިކް ފްލޯ އަދި ޕާކިން ނިޒާމު ހަރުދަނާކުރުމަށް ބޭނުންވާ ބަދަލުތައްވެސް މި ދިރާސާގެ ތެރެއިން ފާހަގަކުރެވޭނެއެވެ.
ރައީސުލްޖުމްހޫރިއްޔާ ޑރ. މުހއްމަދު މުއިއްޒުގެ ވައުދުފުޅުތަކުގެ ތެރެއިން މާލެ އާއި ވިލިމާލޭގެ މަގުތައް އަލުން ހެދުމަށް ވެވަޑައިގަތް ވައުދުގެ ދަށުން، ޗައިނާ ސަރުކާރުގެ ހިލޭ އެހީގައި ކުރިއަށް ގެންދިއުމަށް ހަމަޖެހިފައިވާ މާލެ އާއި ވިލިމާލޭގެ މަގުތައް ރަނގަޅު ފެންވަރަކަށް ތަރައްގީކުރުމުގެ މަޝްރޫއު ނިމުމުން މާލެ އަދި ވިލިމާލޭގެ މަގުތަކުގެ ފެންވަރު ރަނގަޅުވެ، ރައްޔިތުންނަށް ލުއިފަސޭހަ ދަތުރުފަތުރުގެ ނިޒާމެއް ގާއިމުވެގެން ދާނެކަމަށް މިނިސްޓްރީން ވަނީ ފާހަގަކުރައްވާފައެވެ.
