މިފްކޯއަށް މަސްވެރިންނަށް ކިރާފައިވާ މަހަށް ދޭން ޖެހޭ 17،350،903ރ. މިއަދު ޖަމާކުރަން ފަށައިފި އެވެ.
މިފްކޯއިން މީޑިއާތަކާ ހިއްސާކުރި މެސެޖެއްގައި ބުނީ މިދިޔަ މަހުގެ 24އިން މިދިޔަ ބުދަ ދުވަހުގެ ނިޔަލަށް މިފްކޯއަށް ކިރި މަހުގެ ޖުމްލަ 17،350،903 ރުފިޔާއަށް އަރާ ކަމަށާއި އަދި ސަރުކާރުގެ އެހީތެރިކަމާއެކު މި ފައިސާ އެއްކޮށް އޮޑިވެރީންނަށް މިއަދު ޖަމާވާނެ ކަމަށެވެ.
“މަސްވެރިންނަށް ފައިސާ ސަރުކާރުން މި ހަފްތާ ތެރޭގައި ޖަމާކޮށްދޭނެ ކަމަށް މިފްކޯއިން ބުނެފައިވޭ. ސަރުކާރުގެ އެހީތެރިކަމާއެކު މި ފައިސާ އެއްކޮށް އޮޑިވެރިންނަށް މިއަދު ޖަމާވެގެންދާނެ،” މިފްކޯއިން ބުންޏެވެ.
އެންމެ ފަހުން މިފްކޯއިން ހާމަކުރި ގޮތުގައި، މިދިޔަ އަހަރުގެ ނޮވެންބަރު 17އިން ފެށިގެން ޖުލައި މަހުގެ 14 ވަނަ ދުވަހުގެ ނިޔަލަށް މަސްވެރިންނަށް ވަނީ ބިލިއަނަކަށް ވުރެ ފައިސާ ޖަމާކޮށްދީފައެވެ.
މިފްކޯއިން މަސްވެރިންނަށް ދޭން ޖެހޭ ފައިސާ ނުދީ ދިގުލައިގެން ދިޔުމާ ގުޅިގެން ބައެއް ރަށްރަށުގައި އެކަމާ ދެކޮޅަށް އިހުތިޖާޖުތައް ވަނީ ކޮށްފަ އެވެ.
މި ސަރުކާރުން ވެރިކަމަށް އައީ މިފްކޯއަށް ކިރާ މަހަށް ލަސްވެގެން 48 ގަޑިއިރު ތެރޭގައި ފައިސާ ދޫކުރާނެ ކަމަށް ވައުދުވެގެންނެވެ. ނަމަވެސް މިފްކޯގެ ހާލަތު އޮތް ގޮތުން އެ ހިސާބަށް ވާސިލުވާން ދެ އަހަރުވަރު ނަގާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ކުރިން ވިދާޅުވި އެވެ.
މަސްވެރިންގެ ކަންބޮޑުވުންތައް ބޮޑުވެ، ސަރުކާރުން ނިންމާފައިވަނީ މިފްކޯއިން މަސް ގަންނާނީ ބައިނަލްއަގުވާމީ ބާޒާރުގެ އަގަށް ކަމަށެވެ. އަދި އެ ބަދަލާއެކު، މަސްވެރިން ކިރާ މަހަށް ދެ ހަފުތާގެ ތެރޭގައި ފައިސާ ދޫކުރެވޭނެ ކަން މިނިސްޓަރު ކުރިން ވިދާޅުވެފައިވެއެވެ.
