ދ. ކުޑަހުވަދޫ ކައިރިން ދަތުރުކުރަމުންދިޔަ ދޯންޏެއްގައި އަލިފާނުގެ ޙާދިސާއެއް ހިނގައިފިއެވެ.
އަލިފާނުގެ ހާދިސާއެއް ހިނގާފައި ވަނީ، ދ. އަތޮޅުގައި އޮންނަ ކަނޑިންމަ ރިސޯޓަށް ފެން ހިފައިގެން ދިޔަ ދޯންޏެއްގައި ކަމަށް އެމްއެންޑީއެފުން މައުލޫމާތު ދެއްވައެވެ.
އެމްއެންޑީއެފުން މީޑިއާތަކަ ހިއްސާކުރި މެސެޖެއްގައި ވަނީ، “ހަމްދު” ނަމަކަށް ކިޔާ މުދާ އުފުލާ މި ދޯނީގެ އިންޖީނު ރޫމުގައި އަލިފާނުގެ ހާދިސާއެއް ހިނގައިގެން އުޅޭކަމުގެ މައުލޫމާތު އެމްއެންޑީއެފް ސެންޓްރަލް އޭރިއާ ކޮމާންޑް، ދ.ކުޑަހުވަދޫ ފަޔާ ސްޓޭޝަނަށް ލިބުނީ މިއަދު ހެނދުނު 7:20 ހާއިރު ކަމަށެވެ. އެއާއެކު، އެ ފަޔާ ސްޓޭޝަނުގެ ފަޔާ ފައިޓަރުން އަލިފާން ނިއްވުމަށް ހަރަކާތްތެރިވިކަމަށް ސިފައިން ބުންޏެވެ.
ދޯނީގައި ރޯވެފައިވާ އަލިފާންގަނޑު މިހާރު ވަނީ ކޮންޓްރޯލް ކުރެވިފައިވާއިރު ދޯނިން ދަތުރުކުރި 4 މީހުންގެ ހާލުވެސް ރަނގަޅު ކަމަށާއި، ދޯނި ވަރަށް ބޮޑަށް އަނދާފައި ވާކަމަށް އެމްއެންޑީއެފުން ބުންޏެވެ.
