މަސްވެރިންނަށް ނުދެވި ހުރި ފައިސާ އަންނަ ހަފުތާގެ ނިޔަލަށް ދައްކާ ޚަލާސްކުރެވޭނެކަމަށް މިފްކޯއިން ވިދާޅުވެއްޖެއެވެ.
މިފްކޯއިން މީޑިއާތަކާއި ހިއްސާކުރި މެސެޖެއްގައި ބުނީ، މި މަހުގެ ކުރީކޮޅުން ފެށިގެން މަސްވެރިންގެ ފައިސާ ނުދެވިހުރި ބިލްތަކާ ގުޅުވައި ފިޝަރީސް މިނިސްޓްރީއާއި ފިނޭންސް މިނިސްޓްރީއާ އެ ކުންފުންޏާ ދެމެދު މަޝްވަރާ ކޮށްފައިވާ ކަމަށެވެ. އަދި މި މަޝްވަރާތަކުގައި މިވަގުތަށް ހައްލު ހޯދިފައިވާ ކަމަށްވެސް އެ ކުންފުނިން ވަނީ ބުނެފައެވެ.
މީގެއިތުރުން، މިފްކޯއަށް މައުލޫމާތު ލިބިފައިވާ ގޮތުން، ސަރުކާރުގެ އަމާޒަކީ އަންނަ ހަފްތާގެ ނިޔަލަށް ފައިސާ ދައްކާ ޚަލާސްކުރުން ކަމަށް މިފްކޯއިން ބުނެފައިވެއެވެ.
އެ ވުޒާރާއާއިން ވިދާޅުވީ، މަސްވެރިންނަށް ނުދެވި ހުރީ 24 އޮގަސްޓް އިން ފެށިގެން 25 ސެޕްޓެމްބާއި ހަމައަށް ނުދެވި ހުރި 17 މިލިއަން ރުފިޔާ ކަަމަށާއި މިދިޔަ އަހަރުގެ ނޮވެންބަރު 17އިން ފެށިގެން ޖުލައި މަހުގެ 14 ވަނަ ދުވަހުގެ ނިޔަލަށް މަސްވެރިންނަށް ވަނީ ބިލިއަނަކަށް ވުރެ ފައިސާ ޖަމާކޮށްދީފައި ކަމަށް މިފްކޯއިން މީގެ ކުރިން ވަނީ ބުނެފައެވެ.
މަސްވެރިންގެ އަތުން ގަންނަ މަހަށް ދޭންޖެހޭ ފައިސާ ގަވާއިދުން ދެވޭނެ އިންތިޒާމެއް ހަމަޖެއްސުމަށްޓަކައި މިދިޔަ ޖުލައި މަހުން ފެށިގެން މިފްކޯއިން މަސްވެރިންއަތުން މަސް ގަންނަމުންދަނީ ބައިނަލްއަޤްވާމީ ބާޒާރުގައި ގަނޑުކުރި ކަޅުބިލަމަހުގެ އަގު ހުރި މިންވަރަށާއި، މަސް ގަނެ އެކްސްޕޯޓުކުރުމަށް ހިނގާނޭ ޚަރަދުތަކަށް ބަލައި ކޮންމެ ހަފްތާއަކު ހަމަޖައްސާ އަގެއްއެވެ.
