ދުނިޔޭގެ ކްރެޑިޓް ރޭޓިން ފާމް ‘ފިޗް’ އިން ރާއްޖެއަށް ދީފައިވާ ރޭޓިން “ސީސީސީ” އިން “ސީސީ” ގްރޭޑިން އަށް ދަށްކޮށްފިއެވެ.
ފިޗްއިން ނެރުނު މައުލޫމާތުގައި ފާހަގަކޮށްފައިވާ ގޮތުން މިއަހަރުގެ މެއި މަހު 492 މިލިއަން ޑޮލަރު ރާއްޖޭގެ ޖުމްލަ ބޭރު ފައިސާގެ ރިޒާވްގައި ހުއްޓެވެ، އަދި މިއަހަރުގެ ޖުލައި މަހު 395 މިލިއަން ޑޮލަރަށް އެ އަދަދު ދަށްވެފައިވާއިރު މިއީ ގާތްގަނޑަކަށް 20 އިންސައްތަ ދަށްވުމެއްކަން ވަނީ ފާހަގަކޮށްފައެވެ.
މި ރިޕޯޓުގައި ފާހަގަކޮށްފައިވާ ގޮތުން ރާއްޖޭން ބޭރުގެ ދަރަނީގެ ޖުމްލަ 2025 ވަނަ އަހަރު 557 މިލިއަން ޑޮލަރަށް އިތުރުވާނެ ކަމަށް ލަފާކޮށްފައިވާއިރު މި އަދަދު އެއް ބިލިއަން ޑޮލަރަށް ވުރެ މައްޗަށް އަރާނެ ކަމަށް ވަނީ ލަފާކޮށްފައެވެ. އޭގެ ތެރޭގައި 500 މިލިއަން ޑޮލަރުގެ ސުކޫކެއް އަނބުރާ ދެއްކުން ހިމެނޭ ކަމަށް ފިޗްއިން ބުނެފައެވެ.
ރާއްޖޭގެ އެތެރޭގެ ދަރަނި ބޮޑުވެފައިވާ ސަބަބުތައް ކަމަށް ފިޗުން ގާބޫލުކުރާ ސަބަބުތަކުގެ ތެރޭގައި، ސަރުކާރުގެ މަޝްރޫއުތަކަށް ކުރާ ހޭދަ މަތިވުމާއި، ކާބޯތަކެއްޗާއި ތެލާއި އެހެނިހެން ތަކެތި އިމްޕޯޓްގެ މައްޗަށް ބަރޯސާވެފައި އޮތުމާއި އެކަމުގެ ސަބަބުން ޑޮލަރަށް ޑިމާންޑު ބޮޑުވުން ހިމެނެއެވެ.
މިހާރުގެ މާލީ ހާލަތު ބަދަލުކުރުމަށް ރާއްޖެއަށް ކުރެވިދާނެ ކަންކަންވެސް ފިޗް އިން ވަނީ ފާހަގަކޮށްފައެވެ. އެގޮތުން ފިޗް އިން ބުނީ ސްޓްރެޓެޖިކް ބައިލޭޓަރަލް ޕާޓްނަރުންނާ އެކު ޑޮލަރުގެ ބަދަލުގައި އެ ގައުމުތަކުގެ ފައިސާއިން މުއާމަލާތްކުރަން އެއްބަސްވުން ހެދުމަކީ ވެސް ބޭރުގެ މާލީ އެހީ ރާއްޖެއަށް ލިބުމަށް މަގުފަހިވާނެ ކަމެއްކަމަށެވެ. އަދި އިގުތިސާދު ހަމަ މަގަށް އެޅުވުމަށް ސަރުކާރުން ފިސްކަލް ސްޓްރެޓަޖީއެއް އެކުލަވައިލާ ތަންފީޒު ކުރުމުން، ބޭރުގެ މާލީ އެހީ ލިބުމުގެ ފުރުސަތު ބޮޑުކަން ފާހަގަކޮށްފައިވެއެވެ.
