ކުރީ ސަރުކާރުން ކުރިއަށް ގެންދިޔަ ބޯހިޔާވަހިކަމުގެ މަޝްރޫއުގެ ތެރެއިން ދިން ފްލެޓާއި ގޯތި ނުދީ މި ސަރުކާރުން ލަސްކުރާތީ އާއްމުން އަނެއްކާވެސް މުޒާހަރާއަށް ނިކުމެއްޖެއެވެ.
ރާޅުގަނޑު ސަރަހައްދުގައި ރޭ ކުރި މުޒާހަރާގެ ބައިވެރިން ގޮވާލާފައިވަނީ ރައީސް ޑރ. މުޙައްމަދު މުއިއްޒު ވެވަޑައިގެން ވައުދުފުޅާ އެއްގޮތަށް އެ ގޯތިތަކާ ފްލެޓުތައް ހަވާލުކުރުމަށެވެ. އަދި، ގޯއްޗާއި ފްލެޓުތައް ދޫކުރުމަށް ކަނޑައަޅާފައިވާ ސަރަހައްދުތައް ހިއްކަން ފެށުމަށް މުޒާހަރާގެ ބައިވެރިން ވަނީ ގޮވާލާފައެވެ. މުޒާހަރާގައި ބައެއް މަޖިލިސް މެމްބަރުންގެ އިސްތިއުފާއަށް ވެސް ވަނީ ގޮވާލާފައެވެ.
އެގޮތުން ހެންވޭރު އުތުރު ދާއިރާގެ މެމްބަރު އަހުމަދު އައިފާންއާއި ބާރަށު ދާއިރާގެ މެމްބަރު އިބްރާހިމް ޝުޖާއު ގެ އިސްތިއުފާއަށް ވަނީ ގޮވާލާފައެވެ.
އެއް ސަރުކާރުން ރައްޔިތުންނަށް ދީފައި ހުންނަ އަސާސީ ހައްގުތަކަށް އަނެއް ސަރުކާރުން އަރައިނުގަތުމަށާއި ވީހާ ވެސް އަވަހަށް ގޯތިތަކާއި ފްލެޓުތައް ހަވާލު ކުރުމަށް ބައިވެރިން މުޒާހަރާގައި ވަނީ ގޮވާލާފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
ފްލެޓާއި ގޯތި ދިނުން ލަސްވާތީ އާއްމުން ދަނީ ކޮންމެ ހުކުރު ދުވަހެއްގެ ރޭ ރާޅުގަނޑު ސަރަހައްދުގައި މުޒާހަރާކުރަމުންނެވެ.
