8 ގައުމަކުން ދިވެހިރާއްޖެއަށް ކަނޑައެޅުއްވި އާ ސަފީރުން، އެބޭފުޅުންގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އަރުވައިފިއެވެ.
ހޯމަ ދުވަހު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްސަ ރަސްމިއްޔާތަށް ޤައުމުތަކުގެ ސަފީރުން ރައީސުލްޖުމްހޫރިއްޔާގެ އޮފީހާ ހަމައަށް ވަޑައިގެންނެވީ ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާ ހަމައަށް ހަތްކޮޅުގައި ރަސްމީ ޢިއްޒަތުގައި ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފައެވެ.
އިއްޔެ ފަތްކޮޅު އެރުވި ސަފީރުންނަކީ؛
1 ލާއޯ ޕީޕަލްސް ޑިމޮކްރެޓިކް ރިޕަބްލިކް އިން ރާއްޖެއަށް ކަނޑައެޅުއްވި ސަފީރު ބުންމީ ވަންމަނީ.
ދިވެހިރާއްޖެއާ ލާއޯ ޕީޕަލްސް ޑިމޮކްރެޓިކް އާ ދެމެދު ސިޔާސީ ގުޅުން ގާއިމުކުރީ 2012 ވަނަ އަހަރުގެ ފެބުރުވަރީ މަހުގެ 10 ވަނަ ދުވަހުގައެވެ.
2 ފިންލޭންޑް އިން ރާއްޖެއަށް ކަނޑައަޅުއްވާ ސަފީރު ކިއްމޯ ލަހްޑެވީރްތަ
ދިވެހިރާއްޖެއާ ފިންލޭންޑާ ދެމެދު ސިޔާސީ ގުޅުން ގާއިމުކުރީ 1984 ވަނަ އަހަރުގެ އޮކްޓޯބަރ 01 ވަނަ ދުވަހުގައެވެ.
3 ޕެރޫ އިން ރާއްޖެއަށް ކަނޑައަޅުއްވާ ސަފީރު ހާވިއެރ މެނުއެލް ޕައުލިނިކް ވެލަރޑް
ދިވެހިރާއްޖެއާ ޕެރޫއާއި ދެމެދު ސިޔާސީ ގުޅުން ގާއިމުކުރީ 1989 ވަނަ އަހަރުގެ ފެބްރުއަރީ މަހުގެ 06 ވަނަ ދުވަހުއެވެ.
4 އޮމާން އިން ރާއްޖެއަށް ކަނޑައަޅުއްވާ ސަފީރު އަޙްމަދު ޢަލޫ ސާޢިދު އަލް ރަޝްދީ،
ދިވެހިރާއްޖެއާ އޮމާނާ ދެމެދު ސިޔާސީ ގުޅުން ގާއިމުކުރީ 1981 ވަނަ އަހަރުގެ ފެބްރުއަރީ މަހުގެ 20 ވަނަ ދުވަހުއެވެ.
5 ޗިލީ އިން ރާއްޖެއަށް ކަނޑައަޅުއްވާ ސަފީރު ހުއަން އެންގުލޯ،
ދިވެހިރާއްޖެއާ ޗިލޭއާ ދެމެދު ސިޔާސީ ގުޅުން ގާއިމުކުރީ 1987 ވަނަ އަހަރުގެ މޭ މަހުގެ 01 ވަނަ ދުވަހުގައެވެ.
6 އަޔަލަންޑް އިން ރާއްޖެއަށް ކަނޑައަޅުއްވާ ސަފީރު ކެވިން ކެލީ،
ދިވެހިރާއްޖެއާ އަޔަލެންޑާ ދެމެދު ސިޔާސީ ގުޅުން ގާއިމުކުރީ 1999 ވަނަ އަހަރުގެ ޑިސެމްބަރ މަހުގެ 07 ވަނަ ދުވަހުގައެވެ.
7 ކެމްބޯޑިއާ އިން ރާއްޖެއަށް ކަނޑައަޅުއްވާ ސަފީރު ކޮއީ ކުންގް،
ދިވެހިރާއްޖެއާ ކެމްބޯޑިއާ އާ ދެމެދު ސިޔާސީ ގުޅުން ގާއިމުކުރީ 1995 ވަނަ އަހަރުގެ ސެޕްޓެންބަރު މަހުގެ 21 ވަނަ ދުވަހުގައެވެ.
8 ސްލޮވާކް ރިޕަބްލިކް އިން ރާއްޖެއަށް ކަނޑައަޅުއްވާ ސަފީރު ރޮބަޓް މެކްސިއަން،
ދިވެހިރާއްޖެއާ ސްލޮވާކް ރިޕަބްލިކް އާ ދެމެދު ސިޔާސީ ގުޅުން ގާއިމުކުރީ 1993 ވަނަ އަހަރުގެ ޖަނަވަރީ މަހުގެ 1 ވަނަ ދުވަހުގައެވެ.
އިއްޔެ ފަތްކޮޅު އެރުއްވި ހުރިހާ ސަފީރުންނަކީވެސް ނޮން- ރެޒިޑެންސް ސަފީރުންނެވެ. މިގޮތުން އޮމާންގެ ސަފީރު ފިޔަވައި ހުރިހާ ސަފީރުންވެސް ޤާއިމުވެ ތިއްބަވާނީ އިންޑިއާގެ ނިއުދިއްލީގައެވެ. އޮމާންގެ ސަފީރު ހުންނަވާނީ ސްރީލަންކާގައެވެ.
ސަފީރުކަމުގެ ފަތްކޮޅު ރައީސުލްޖުމްހޫރިއްޔާއަށް އެރުވުމުން ރައީސުލްޖުމްހޫރިއްޔާ ވަނީ އައު ސަފީރުންނަށް ތަހުނިޔާ ވިދާޅުވެ، ދިވެހިރާއްޖެއަށް ވަޑައިގެންނެވިކަމަށްޓަކައި މަރްޙަބާ ވިދާޅުވެފައެވެ. ފަތްކޮޅު އެރުއްވުމުގެ ރަސްމިއްޔާތަށްފަހު ރައީސް ޑރ. މުޙައްމަދު މުޢިއްޒު ވަނީ ސަފީރުންނާއި ވަކިވަކީން ބައްދަލުކުރައްވާފައެވެ. މި ބައްދަލުވުންތަކުގައި ދެޤައުމުގެ ދެމެދުގައި އޮންނަ ގުޅުން އިތުރަށް ބަދަހިކުރެވިދާނެ ދާއިރާތަކާ ގުޅޭގޮތުން މަޝްވަރާކުރެއްވިއެވެ.
