ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް، ރައީސް ޑރ. މުހައްމަދު މުއިއްޒުއަށް ސިހުރު ހެދިކަމުގެ މައްސަލައެއް ފެންމަތިވެފައިވާއިރު އެ މައްސަލައާއި ގުޅިގެން ޝަމްނާޒުގެ ކުރީގެ ފިރިކަލުން، އާދަމް ރަމީޒުވެސް ރައީސް އޮފީހުގެ މިނިސްޓަރުކަމުން ސަސްޕެންޑު ކޮށްފި އެވެ.
މި މައްސަލައާއި ގުޅިގެން ރައީސް އޮފީހުގެ ސްޕޯކްސްޕާސަން ހީލާ ވަލީދު ވިދާޅުވީ ބަލަމުންދާ މައްސަލައަކާއި ގުޅިގެން ރައީސް އޮފީހުގެ މިނިސްޓަރު އާދަމް ރަމީޒު އާއި ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް ސަސްޕެންޑުކޮށްފައިވާ ކަމަށެވެ.
ރަމީޒަކީ ރައީސް ޑރ. މުހައްމަދު މުއިއްޒާ އެކު މާލެސިޓީ ކައުންސިލްގައިވެސް މަސައްކަތް ކުރެއްވި އެމަނިކުފާނުގެ އަރިސް ބޭފުޅެކެވެ. އެންމެ ފުރަތަމަ ރައީސް އޮފީހަށް އައްޔަން ކުރެއްވި ބޭފުޅުންގެ ތެރޭގައިވެސް ރަމީޒު ހިމެނޭއިރު، ސަރުކާރުގެ ފުރަތަމަ ދުވަސްކޮޅު ރަމީޒު ވަރަށް އިސްކޮށް ހަރަކާތްތެރިވިތަން ފެނުނެވެ. ނަމަވެސް، މިފަހުން ސަރުކާރުގެ ހަރަކާތްތަކުން ރަމީޒެއް ނުފެނެ އެވެ.
މައުލޫމާތު ލިބޭ ގޮތުގައި ޝަމްނާޒުގެ މައްޗަށް ކުރެވެނީ ސިހުރު ހެދިކަމުގެ ތުހުމަތެވެ. މިމައްސަލައާއި ގުޅިގެން ޝަމްނާޒު ދިރިއުޅޭ އެޕާޓްމެންޓު ބަލާ ފާސްކުރިއިރު ސިހުރު ހެދުމަށް ބޭނުންކުރާ ބައެއް ސާމާނު ފުލުހުންނަށް ފެނިފައިވެއެވެ.
ޝަމްނާޒު ހައްޔަރުކޮށް ކޯޓަށް ހާޒިރުކޮށްފައިވާއިރު އޭނާ 7 ދުވަހަށް ބަންދު ކުރަން ކޯޓުން ވަނީ އަމުރުކޮށްފަ އެވެ. ކޯޓުގައި ޝަމްނާޒު ސިހުރު ހެދިކަމަށް އެއްބަސްވި ނަމަވެސް ރައީސަށް ސިހުރު ހަދާފައި ނުވާނެ ކަމަށް އޭނާވަނީ ބުނެފައެވެ. ޝަމްނާޒާއެކު އިތުރު ދެމީހަކުވެސް ހައްޔަރުކުރިއެވެ. ހައްޔަރުކުރި މީހުންގެ ތެރޭގައި ރަމީޒެއް ނުހިމެނެ އެވެ.
ޝަމްނާޒަކީ އާދަމް ރަމީޒުގެ ދެ އަނބިކަނބަލުންގެ ތެރެއިން އެކަކެވެ. އެހެންނަމަވެސް މީގެ ދުވަސްކޮޅެއްކުރިން ޝަމްނާޒް އާއި ރަމީޒްގެ ކައިވެނިވަނީ ރޫޅާލާފައެވެ. މީގެ ކުރިން ޝަމްނާޒް ހުންނެވީ މާލެސިޓީ ކައުންސިލްގެ މެންބަރަކަށެވެ. ރައީސް މުއިއްޒު ވެރިކަމަށް ވަޑައިގެންނެވުމުން އޭނާ އެ މަގާމުން އިސްތިއުފާ ދެއްވިއެވެ. ޝަމްނާޒް އެންމެ ފުރަތަމަ އައްޔަން ކުރެއްވީ މުލީއާގެއަށެވެ.
