ބަދަލަކަށް އެރި ވައުޓް ވެހޯސްޓް ފަހުވަގުތު ޖަހައިދިން ލަނޑުން ނެދަލެންޑްސް މޮޅުވެ، އުންމީދު އައުކޮށްފިއެވެ.
ޔޫރޯ ފުޓްބޯޅަ މުބާރާތުގެ ގުރޫޕް ޑީގައި ހިމެނޭ ދެޓީމްކަމަށް ވާ ޕޮލަންޑް އަދި ނެދަލެންޑްސް މިރޭ ވާދަކުރި މެޗުން ނެދަލެންޑްސް މޮޅުވީ 2-1ގެ ނަތީޖާއިންނެވެ.
މި މެޗުގައި ފެނިގެންދިޔަ ފުރަތަމަ ލަނޑު މެޗުގެ 16 ވަނަ މިނެޓްގައި ކާމިޔާބު ކުރީ ޕޮލެންޑުންނެވެ. ޕޮލެންޑަށް ލިބުނު ކޯނަރަކުން މި ގޯލު އެޓީމަށް ކާމިޔާބުކޮށްދިނީ އެޑަމް ބަކްސާ އެވެ. ނަމަވެސް މެޗުގެ 29 ވަނަ މިނެޓުގައި ނެދަލަންޑްސް އިން ވަނީ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އޭރިއާ ބޭރުން ގަކްޕޯ ފޮނުވާލި ބާރު ހަމަލާ ޕޯލަންޑްގެ ޑިފެންޑަރެއްގެ ފައިގައި ޖެހިފައި މިސްރާބު ބަދަލުވެގެން ގޮސް ވަނީ ގޯލުގެ އަރިމަތީ ކަނަށެވެ.
މި ލަނޑަށްފަހު ވެސް ލީޑު ނަގަން ފުރަތަމަ ހާފުގައި ނެދަލޭންޑްސްގެ ގަކްޕޯ އަދި މެމްފިސް ޑެޕާއި އަށް ރަނގަޅު ފުރުސަތުތަކެއް ލިބި ބޭކާރުވެފައިވެ އެވެ. އެގޮތުން ނެދަލެންޑްސްގެ ގަކްޕޯ ގޯލްއޭރިޔާ ކަނާ ދިމާލުން ފޮނުވާލި ބޯޅަ ޕޮލެންޑް ކީޕަރު ކޯނަރަކަށް ބޭރުކޮށްލިއެވެ. އަދި މިޑްފީލްޑަރ ޓިޖާނީ ރެޖިންޑާރސް އަށް ލިބުނު ބޯޅަ ފޮނުވާލެވުނީ ގޯލްގެ އަރިމަތިން ބޭރަށެވެ. މީގެ އިތުރުންވެސް ނެދަލެންޑްސްއަށް ލަނޑު ޖަހަން ގިނަ ފުރުސަތުތަކެއް ވަނީ ލިބި ބޭކާރުވެފައެވެ.
މެޗުގެ ދެވަނަ ހާފުގައި ވެސް މޮޅަށް ކުޅުނީ ނެދަލަންޑްސް އިންނެވެ. އެގޮތުން އެޓީމުން ވަނީ ޕޮލަންޑްގެ ޑިފެންސްލައިނަށް ބާރުބޮޑުކޮށްފަ އެވެ. ގަކްޕޯ މުޅިން ހުސްކޮށްލާފަ އޭރިޔާ ތެރެއިން ޒަވީ ސިމޯންސް އަށް ދިން ބޯޅަ ވެސް ފޮނުވާލެވުނީ އަރިމަތިން ބޭރަށެވެ. މިހާފްގައި ޕޮލެންޑްގެ ކިވިއޯ އަށް 58 ވަނަ މިނިޓްގައި ލަނޑެއް ޖަހާނެ ފުރުޞަތެއް ލިބުނެވެ. އެކަމަކު ރަނގަޅަށް ފޮނުވާލި ނަމަވެސް ކީޕަރު އެ ބޯޅަ ދިފާއު ކުރީއެވެ.
މެޗުން މޮޅެއް ހޯދަން ނެދަލެންޑްސް އިން ހުއްޓުމެއް ނެތި ކުރަމުން ދިޔަ މަސައްކަތް ކާމިޔާބުވީ 83 ވަނަ މިނިޓްގައި ބަދަލަކަށް ކުޅެން އެރި ވައުޓް ވެހޯސްޓް ލަނޑު ޖަހާ ލީޑް ނަގައި ދިނުމުންނެވެ. އޭނާ 81 ވަނަ މިނިޓްގައި ކުލެން ނިކުތީ ޑިޕާއީގެ ބަދަލުގައެވެ.
ނެދަލެންޑްސްގެ މި ލަނދަށްފަހު ޕޮލަންޑުން ވެސް ލަނޑެއް ޖެހޭތޯ ގިނަ މަސައްކަތްތަކެއް ކުރިއެވެ. އެގޮތުން ފުލުފުލުގައި ނުރައްކާ ދެ ހަމަލާއެއް ނެދަލެންޑްސްގެ ގޯލަށް ފޮނުވާލިއެވެ. އެގޮތުން ބަދަލަކަށް ނިކުއިން ޕިއޮޓޮރޮސްކީ ފޮނުވާލި ނުރައްކާތެރި ބޯޅަ ނެދަލެންޑްސް ކީޕަރު ދިފާއުކުރިއިރު، ނިކޯލާ ޒަލެވުސްކީ ފޮނުވާލި ބާރު ބޯޅަވެސް ނެދަލެންޑްސް ކީޕަރު ވަނީ މަތަކޮށްފައެވެ.
ގްރޫޕް ޑީގައި ހިމެނޭ ނެދަލަންޑްސް އިން މުބާރާތުގައި ކުޅޭ ދެވަނަ މެޗުގައި ނުކުންނާނީ ފްރާންސްއާ ދެކޮޅަށެވެ. ޕޮލެންޑް ނުކުންނާނީ އޮސްޓްރިއާއާއި ދެކޮޅަށެވެ.
