ފަލަސްތީނަށް އެހީވާ އދ.ގެ ގޮފި ޔުނިއިޓެޑް ނޭޝަނަސް ރިލީސް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސްއަށްް ރާއްޖެއިން ދޭ އެހީ 50،000 ޑޮލަރަށް އިތުރު ކުރުމަށް، ރައީސް ޑރ. މުހައްމަދު މުއިއްޒު ނިންމާފައިވާ ކަމަށް ފޮރިން މިނިސްޓްރު މޫސާ ޒަަމީރު ވިދާޅުވެއްޖެއެވެ.
މިހާރު ކުރަމުންދާ މަސައްކަތުން ލިބޭ ފައިސާ ހަވާލު ކުރަން ރާވަފައި ވަނީ އދ.އިން 1948 ވަނަ އަހަރު ފާސްކޮށްފައިވާ ގަރާރަކުން ވުޖޫދަށް އައިސްފައިވާ ޔޫއެންއާރްޑަބްލިވްއޭއާ ކަމަށެވެ. ފާއިތުވި އަހަރުތަކުގައިވެސް މި ފަންޑަށް ދައުލަތުން އެހީވަމުން އަންނަކަން ފާހަގަކުރައްވަމުން މޫސާ ޒަމީރު ވިދާޅުވީ ކޮންމެ އަހަރަކު ރަމްޒީ އެހީގެ ގޮތުގައި 5،000 ޑޮލަރު ޑޮލަރު ދެމުން އަންނަކަމަށެވެ.
މިދިޔަ އަހަރުގެ އޮކްޓޯބަރު 7ގެ ފަހުން އިޒްރޭލުން ދެމުންގެންދާ ހަމަލާތަކުގެ ސަބަބުން ފަލަސްތީނުގެ ހާލުގައިޖެހިފައިވާ ފަރާތްތަކަށް އެހީގެ ގޮތުގައި މީގެ 10 ޕަސެންޓް އިތުރު އަދަދެއް ދިނުމަށް ރައީސުލްޖުމްހޫރިއްޔާ ވަނީ ނިންމާފައެވެ. އެ ގޮތުން މޫސާ ޒަމީރު ވިދާޅުވީ މި އަހަރު މި ފަންޑަށް 50،000 ޑޮލަރު ދިނުމަށް ރައީސް ނިންމަވާފައިވާކަމަށެވެ.
މީގެ އިތުރުން މިނިސްޓަރު ވިދާޅުވީ މި ޓެލެތޯންއިން ލިބޭ ފައިސާ ޔޫއެންއާރްޑަބްލިވްއޭ ހަވާލު ކުރާނީ ފިނޭންސް މިނިސްޓްރީ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އާ މެދުވެރިކޮށް، ފޮރިން މިނިސްޓްރީގެ ބެލުމުގެ ދަށުން ކަަމަށެވެ.
