އަލިފްދާލުގެ ސިއްޙަތާއި ބެހޭ ޖަމްޢިއްޔާ، ވޯލްޑް ހެލްތް އޯގަނައިޒޭޝަންގެ މެންބަރުކަން ފަލަސްތީނަށް ލިބިއްޖެއެވެ.
ވޯލްޑް ހެލްތު އެސެމްބްލީގައި ފަލަޞްޠީނަށް މެންބަރުކަން ދިނީ ވޯޓުލުން ފިޔަވާ، އެހެން ހުރިހާ ޙައްގެއް ލިބިގެންދާ ގޮތަށެވެ. ފަލަސްޠީނަށް މެންބަރުކަން ލިބުނީ ރާއްޖޭގެ ވޯޓާވެސް އެކުގައެވެ.
މިކަން ހާމަކުރައްވަމުން ސިއްޙަތާ ބެހޭ ވަޒީރު ޑރ.ޢަބްދުﷲ ޚަލީލު އެކްސްގައި ކުރެއްވި ޕޯސްޓެއްގައި ވިދާޅުވީ ފަލަސްޠީނުގެ ރައްޔިތުންނަށް ލިބެންޖެހޭ ޙައްޤުތައް ކަށަވަރު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ފުރިހަމަ ލަފާފުޅާއެކު ވާރލްޑް ހެލްތު އެސެމްބްލީގައި ރާއްޖޭން ވަރަށް ބޮޑަށް ވަކާލާތުކޮށްފައިވާނެ ކަމަށެވެ.
https://x.com/abkhaleel/status/1796974864500428882
ސްވިޓްޒަރލޭންޑުގެ ޖެނީވާގައި ބޭއްވި މިއަހަރުގެ ވޯލްޑު ހެލްތު އެސެމްބުލީގައި ވެސް ބައިވެރިވެ ވަޑައިގެންނެވި ޑރ.ޢަބްދުﷲ ޚަލީލު ، އެ އެސެމްބްލީގައި ތަޤްރީރުކުރައްވަމުން ދިވެހިން އަބަދުވެސް ތިބޭނީ ފަލަސްޠީނުގެ ރައްޔިތުންނާއި އެކުގައިކަމަށް ވިދާޅުވެފައިވެއެވެ. އަދި މިހާރު އެޤައުމުގެ ރައްޔިތުންނާއި ދެކޮޅަށް ހިނގަމުންދާ ލާއިންސާނީ އަމަލުތައް ރާއްޖެއިން ކުށްވެރިކޮށްފައިވާ ކަމަށް ވިދާޅުވެ ޑރ. ޚަލީލު ވަނީ އިންޓަރނޭޝަނަލް ހިއުމަނިޓޭރިއަން ލޯ އާއި ޚިލާފަށް އެތައް ކަމެއް ފަލަސްތީނާއި ދެކޮޅަށް ހިނގަމުންދާކަން ފާހަގަކުރައްވާފައެވެ. އެގޮތުން ސިއްޙީ ޚިދުމަތްދޭ ތަންތަނަށް އަމާޒުކޮށް ދެމުންދާ ޙަމަލާތަކާއިމެދު ވަޒީރު ކަންބޮޑުވުން ފާޅުކުރެއްވިއެވެ.
ވޯލްޑް ހެލްތު އެސެމްބްލީގައި ފަލަސްތީނާއި ގުޅޭގޮތުން ނެގި ވޯޓުގައި ރާއްޖެއިންވަނީ ބައިވެރިވެ އެޤައުމުގެ ސިއްޙީ ހާލަތު ރަނގަޅު ކުރުމަށް ވޯޓު ދެއްވި 101 ގައުމުގެ ތެރޭ ހިމެނިފައެވެ.
77ވަނަ ވޯލްޑް ހެލްތު އެސެމްބްލީ ކުރިއަށް ދިޔައީ ސުވިޓްޒަލޭންޑުގެ ޖެނީވާގައެވެ. 192 ޤައުމެއްގެ ހެލްތު މިނިސްޓަރުން ބައިވެރިވެވަޑައިގެންނެވި މި އެސްމްބްލީގެ މިއަހަރުގެ ޝިއާރަކީ “އޯލް ފޯ ހެލްތު، ހެލްތު ފޯ އޯލް’ އެވެ.
