ދުނިޔެ ހޫނުވުމުގެ ސަބަބުން ރާއްޖެ ފަދަ ޖަޒީރާ ޤައުމުތަކަށް ދިމާވަމުންދާ ތިމާވެށީގެ މައްސަލަތަކުން އަރައިގަތުމަށް ޤައުމުތައް ގުޅިގެން މަޝްވަރާކުރުމަކީ ވަރަށް މުހިންމު ކަމެއް ކަމުގައި ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެވެ.
މި ޚިޔާލު ފާޅުކުރެއްވީ، ކޯލިޝަން އޮފް ލޯ-ލައިންގ އެޓޯލް ނޭޝަންސް އޮން ކްލައިމެޓް ޗޭންޖް (ކޭންސީސީ) ގައި ހިމެނޭ 5 ޤައުމެއް ގުޅިގެން ރާއްޖޭގައި މިއަދު ފެށި މަޝްވަރާ ބައްދަލުވުމެއްގައި ވާހަކަފުޅު ދައްކަވަމުންނެވެ. މި 3 ދުވަހުގެ ބައްދަލުވުން ބާއްވަނީ ޤައުމުތަކުގެ ތިމާވެށީގެ ނޭޝަނަލް އެޑެޕްޓޭޝަން ޕްލޭން އިތުރަށް ތަރައްޤީކުރުމަށް މުހިންމު ޚިޔާލާއި މަޝްވަރާ ހޯދުމަށެވެ.
“ރާއްޖެ ފަދަ ޖަޒީރާ ޤައުމުތަކަށް މިހާރު ދިމާވަމުންދާ ރަށްގިރުމާއި، މޫސުމީ ނޭދެވޭ ބަދަލުތައް ހައްލުކުރުމަށް އެކި ޤައުމުތަކުން ކުރާ މަސައްކަތްތަކުން އެއް ޤައުމުން އަނެއް ޤައުމަށް ފިލާވަޅު ހޯދައި، އަދި އެގޮތަށް ކަންކަން ރޭވުމުން އަޅުގަނޑުމެން މޫސުމީ ބަދަލުތަކަށް ހެޔޮގޮތުގައި ތައްޔާރުވެވޭނެ،” ވަޒީރު ފާހަގަކުރެއްވި ގޮތެވެ.
ރާއްޖޭގެ އިތުރުން ޓޮކަލައު، ޓުވާލޫ، ކިރިބާސް އަދި މާޝަލް ޖަޒީރާއިން ބައިވެރިވާ މި ބައްދަލުވުމުގައި، ޚާއްސަ ގޮތެއްގައި މަޝްވަރާކުރާނީ ގޮނޑުދޮށަށް ކުރިމަތިވާ ތިމާވެށީގެ ގޮންޖެހުންތަކާ ގުޅޭގޮތުންނެވެ.
ކޭންސީސީގައި މުޅިއެކު 35 ޤައުމު ހިމެނޭއިރު، 2023 ވަނަ އަހަރަށް އޭގެ ޗެއަރކުރާ ޤައުމަކަށް ރާއްޖެ ހޮވިފައިވާތީ މިފަހަރުގެ މަޝްވަރާ ބައްދަލުވުން ބޭއްވީ ރާއްޖޭގައެވެ. މި ބައްދަލުވުން ރާވައި ހިންގުމުގައި ނޭޝަނަލް އެޑެޕްޓޭޝަން ޕްލޭން (އެންއޭޕީ) ގްލޯބަލް ނެޓްވޯރކް އިން އެހީތެރިކަން ފޯރުކޮށްދެއެވެ.
ތިމާވެށްޓާބެހޭ ވުޒާރާ އިން ބުނާ ގޮތުގައި، މި މަޝްވަރާ ބައްދަލުވުމަކީ ބައިވެރިވާ ޤައުމުތަކުން މޫސުމީ ބަދަލުތައް ރައްދުކުރުމަށް ތަޖުރިބާ ހިއްސާކޮށް، އަތޮޅުތަކަށް ކުރިމަތިވާ ތިމާވެށީގެ މައްސަލަތައް ޙައްލުކުރުމުގެ ޤާބިލްކަން އިތުރުކުރުމަށް މަގުފަހި ކޮށްދޭނެ ބައްދަލުވުމެކެވެ.
ބަދަލުވަމުންދާ މޫސުމީ ހާލަތާއެކު، ފެން ބޮޑުވުމާއި، ރަށް ގިރުން ފަދަ ކަންކަމުން ރައްކާތެރި ކަމާއެކު ދިރިއުޅުމަށް ތައްޔާރުވުމުގެ ގޮތުން ކުރަންޖެހޭ ކަންކަމަށް މި ބައްދަލުވުމުން ލަފައާއި މަޝްވަރާ ހޯދައި، އަދި އެކަމަށް އެކުލަވާލާ ޤައުމީ ޕްލޭންތައް ފުރިހަމަކުރުމަށް މަގުފަހި ކޮށްދޭނެ ކަމަށް ތިމާވެށްޓާބެހޭ ވަޒީރު އުއްމީދުކުރައްވައެވެ.
