އިޒްރޭލުގައި ހުންނަ އެމެރިކާގެ އެމްބަސީ ގުދުސަށް ބަދަލުކޮށް ގުދުސަކީ އިޒްރޭލުގެ ވެރިރަށް ކަމަށް އެމެރިކާ އިން ނިންމި ނިންމުމަކީ ޣައިރު ގާނޫނީ ނިންމުމެއް ކަމަށް އދ.ގެ އާންމު މަޖިލީހުގެ ބޮޑު އަޣުލަބިއްޔަތަކުން ފާސްކޮށްފި އެވެ
ގުދުސްއަކީ އިސްރާއިލުގެ ވެރިރަށުގެ ގޮތުގައި އެމެރިކާއިން ބަލައިގެންފައިވާތީ އެނިންމުން އަނބުރާ ގެންދިޔުމަށް އދ.ގެ އާންމު މަޖިލީހަށް ޔަމަނުން ހުށަހެޅި ގަރާރު ފާސްކޮށްފައިވަނީ 128 ގައުމުގެ ތާއީދާ އެކުގަ އެވެ. މި ގަރާރާ ދެކޮޅަށް ނުވަ ގައުމުން ވޯޓުދީފައިވާއިރު 35 ގައުމަކުން ވޯޓުގައި ބައިވެރި ވެފައެއް ނުވެއެވެ
އާންމު މަޖިލީހުގެ ޖަލްސާގައި ބަހުސްކުރަމުން އިޒްރޭލުގެ ސަފީރު ވިދާޅުވީ ޔުނެސްކޯ އަށް ވެސް އަދި އދ.ގެ އެހެން ގުނަވަނަކަށް ވެސް ޔަހޫދީން ގުދުސާ ދުރު ނުކުރެވޭނެ ކަމަށާއި އިޒްރޭލާއި ގުދުސާ ދެމެދު އޮތް ގުޅުމަކީ ވަރަށް ޒަމާންވީ ގުޅުމެއް ކަމަށެވެ. އަދި އަންޒަމާނުއްސުރެ ގުދުސަކީ ޔަހޫދީންގެ ބިމެއްކަމަށާއި އެ ގުޅުން އުފެދިފައިވަނީ ދާވޫދުގެފާނާ ހަމައިން ކަމަށް ވެސް ސަފީރު ވިދާޅުވިއެވެ.މި ވޯޓުގައި ފަލަސްތީނާއި އެއްކޮޅަށް ވޯޓު ދީފައިވާ ތުރުކީގެ ޚާރިޖީ ވަޒީރު ވިދާޅުވީ އިރުމަތީ ގުދުސަކީ ފަލަސްތީނުގެ މިނިވަން ދައުލަތުގެ ވެރިރަށް ކަމަށް އޯއައިސީގެ ހާއްސަ ބައްދަލުވުމުގެ އިއްތިފާގުންވެސް ނިންމާފައިވާ ކަމަށެވެ. އަދި ފަލަސްތީނުގެ ބިމުގައި މިނިވަން ދައުލަތެއް ގާއިމު ކުރުމަކީ ފަލަސްތީނު މީހުންނަށް ވެސް ލިބިގެންވާ ހައްގެއް ކަމަށާ އިތުރުކީން އެއްވެސް ހާލެއްގައި ފަލަސްތީނު ރައްޔިތުން އެކަނި ދޫކޮށްނުލާނެ ކަމަށެވެ
