އައްޑޫ ސިޓީ މީދޫ ކޯގަންނު ގަބުރުސްތާނުގެ މަހާނަ ގާތަށް މަރާމާތުކުރުމުގެ މަސައްކަތް ފަށައިފިއެވެ.
މީދޫ އަވަށު އޮފީހުން ބުނީ ސެޕްޓެމްބަރު 22، 2023 ވަނަ ދުވަހު ކޯގަންނު ގަބުރުސްތާނަށް ދިން ގެއްލުމުގައި ހަލާކުވެފައިވާ މަހާނަގައުތައް މަރާމާތުކުރުމުގެ މަސައްކަތް ސަގާފީ ތަރިކަ ރައްކާތެރިކުރާ ގައުމީ މަރުކަޒުގެ ފަންނީ މުވައްޒަފެއްގެ އިރުޝާދުގެ ދަށުން ކުރިއަށް ގެންގޮސްފައިވާ ކަމަށެވެ.
މި މަސައްކަތުގެ ތެރެއިން، މަހާނަ ގަލަށް ލިބޭ ގެއްލުންތައް މަރާމާތުކުރުމަށް އަވަށު އޮފީހުގެ 3 މުވައްޒަފަކު ތަމްރީނުކޮށްފައިވެއެވެ.
މީދޫ ކޯގަންނު ގަބުރުސްތާނަކީ ދިވެހިރާއްޖޭގައި އޮތް އެންމެ ގަދީމީ އަދި ތާރީހީ ގަބުރުސްތާނުގެ ގޮތުގައި ހިމާޔަތްކުރެވިފައިވާ ތަނެވެ. އެތަނުގައިވާ މިސްކިތްތަކާއި، މަގްބަރާތަކާއި މަހާނަ ގަލަކީ ގައުމީ ސަގާފީ ތަރިކައެކެވެ. އެތަނުގައި ރައްކާކުރެވިފައިވަނީ މީދޫގެ ތާރީހާއި ކާބަފައިންގެ އަގުހުރި މަސައްކަތްތަކެވެ. ކޯގަންނު ގަބުރުސްތާނަކީ ‘ވާރލްޑް މޮނިއުމަންޓް ފަންޑްސް 2022 ވޮޗްލިސްޓް’ ގައި ހިމެނޭތަނެކެވެ.
