ކުރިއަށް އޮތް ރައްޔިތުންގެ މަޖިލިސް އިންތިހާބުގައި ސަރުކާރު ހިންގާ ޕީޕީއެމް/ޕީއެންސީގެ ޓިކެޓްގައި ވާދަކުރައްވާނެ ބޭފުޅުން ކަނޑައެޅުމަށް އިއްޔެ ބޭއްވި ޕްރައިމަރީގައި ކުރީގެ ގިނަ މެމްބަރުންނަށް އެ ޕާޓީގެ ޓިކެޓު ޔަގީންވެއްޖެއެވެ.
އެ ޕްރައިމަރީގައި 73 ދާއިރާއަކުން 71،597 މީހުންނަށް ވޯޓުލުމުގެ ހައްގު ލިބިގެންވާ ކަމަށް އެ ކޯލިޝަނުންވަނީ ބުނެފައެވެ. އެ ދާއިރާތަކަށް 283 ކެންޑިޑޭޓުން ވަނީ ވާދަކޮށްފައެވެ.
އެ ކޯލިޝަނުން ވަނީ 3 ދާއިރާއަކަށް އެ ވާދަނުކުރުމަށްވެސް ވަނީ ނިންމާފައެވެ. އެހެންކަމުން އިއްޔެ ޕީޕީއެމް ޕީއެންސީން ޕްރައިމަރީ ބާއްވާފައި ވަނީ އެ 3 ދާއިރާ ނުހިމެނޭހެން 73 ދާއިރާއަކަށް އެ ޕާޓީގެ ފަރާތުން ވާދަކުރާނެ ކެނޑިޑޭޓުން ކަނޑައެޅުމަށެވެ.
މަޖިލިސް އިންތިހާބުގައި މެމްބަރުން އިންތިހާބު ކުރާ 93 ދާއިރާގެ ތެރެއިން ޕީޕީއެމް ޕީއެންސީގެ ޓިކެޓް ޕްރައިމަރީއަކާއި ނުލައި 13 މީހަކަށް ވަނީ ލިބިފައެވެ. އެ ފަރާތްތަކަށް ޓިކެޓް ކަށަވަރުވީ އިތުރު ބަޔަކު އެ ދާއިރާތަކަށް ވާދަ ނުކުރުމުންނެވެ.
އިއްޔެގެ އިންތިޚާބުގައި ދާއިރާތަކުގެ ވަގުތީ ނަތީޖާ ލިބިފައިވާއިރު، ރައްޔިތުންގެ މަޖިލީހުގެ ކުރީގެ ބައެއް މެމްބަރުންނާއި، މިހާރުވެސް ތިއްބެވި މެމްބަރުން ވަނީ ޓިކެޓް ކަށަވަރުކޮށްފައެވެ. އަދި ކައުންސިލަރުންގެ ތެރެއިންވެސް ބައެއް ބޭފުޅުން ވަނީ މަޖިލިސް ޓިކެޓް ކަށަވަރުކޮށްފައެވެ. މީގެއިތުރުން ސިޔާސީ ދާއިރާއަށް މުޅިން އައު ބޭފުޅުންތަކެއްވެސް ވަނީ ޕީޕީއެމް ޕީއެންސީގެ ޓިކެޓް ކަށަވަރުކޮށްފައެވެ.
ޕީޕީއެމް ޕީއެންސީން ބުނާގޮތުން ޕްރައިމަރީގެ ދާއިމީ ނަތީޖާ ކުރިއަށް އޮތް ހަފްތާހާއެއް ދުވަހުގެ ތެރޭގައި އިއުލާންކުރާނެއެވެ.
