އެފްއޭކަޕް ފުޓްބޯޅަ މުބާރާތުގެ ފައިނަލް ގައި ރޭ ޓީސީ ސްޕޯޓްސް ކުލަބް ދެ ލަނޑު ޖަހާފައިވަނިކޮށް ފަހަތުން އަރައި މެޗު އެއްވަރުކޮށް 12 ވަނަ ފަހަރަށް ނިއުރޭޓިއަންޓް ސްޕޯޓްސް ކުލަބުން އެފްއޭ ކަޕްގެ ޗެމްޕިއަންކަން ހޯދައިފި އެވެ.
ރޭ އެފްއޭ ކަޕްގެ ފައިނަލްގައި ވާދަވެރި މި ދެޓީމް ބައްދަލު ކުރި މެޗު ޓީސީ ސްޕޯޓްސް ކުލަބާ ވާދަކޮށް ނިއު ކާމިޔާބުކޮށްފައިވަނީ މެޗުގެ ފުރިހަމަ ވަގުތު ހަމަވިއިރު ދެ ޓީމް 2-2 ލަނޑުން އެއްވަރު ވެފައިވުމުން ޕެނަލްޓީ ޖަހައިގެން 6-4 ލަނޑުން މެޗް ކާމިޔާބު ކޮށްގެންނެވެ.
ވާދަވެރި އަދި ފޯރިގަދަ ކުޅުމެއް ފެނިގެން ދިޔަ މިމެޗުގައި ޓީސީއިން ވަނީ މެޗް ފަށައިގެން ފަސްވަނަ މިނެޓްގައި ނިއުގެ ގޯލް ފޫ އަޅުވާލައި ނިއު ޕްރެސަރަށް ވައްޓާކައިފައެވެ.މި ލަނޑު ޓީސީއިން ކާމިޔާބުކޮށްފައިވަނީ އިބުރާހީމް މަހުދީ (ހަބޭސް އިއްބެ) ނަގައިދިން ހުރަސް ބޮލުން ގޯލައަށް ފޮނުވާލައިގެން ބިދޭސީ ފޯވާޑު ކޮމިލިއަންސް ސުޓެވާޓެވެ.
މުޅި މެޗުގެ ފުރަތަމަ ހާފްގައި މޮޅު ކުޅުމެއް ދެއްކި ޓީސީގެ ދެވަނަ ލަނޑު މެޗުގެ 25 ވަނަ މިނެޓުގައި އިއްބެ ނިއުގެ އޭރިއާ ތެރެއަށް ވަނުމުން ނިއުގެ ޑިފެންޑަރު އަކުރަމް އަބްދުލްޣަނީ ކުރި ފައުލަށް ގުޅިގެން ލިބުނު ޕެނެލްޓީ ކާމިޔާބުކޮށްދިނީ ޓީސީގެ ދެވަނަ ލަނޑުވެސް ކާމިޔާބުކޮށްދިން ކޮމިލިއަސްއެވެ.
ރޭގެ މެޗު ފުރަތަމަ ހާފް 2-0 ލަނޑުގެ ނަތީޖާ އަކުން ޓީސީ ނިންމާލި ނަމަވެސް ނިއުއިން ވަނީ ދެވަނަ ހާފުގައި މެޗުގެ ކުޅުން ފަރުގަދަ ކޮށް ތަޖުރިބާކާރު ކުޅުންތެރިޔާ އިބްރާހިމް ފަޒީލް (އޮއްޕޮ)ގެ ލަނޑުން މެޗުގެ ފަރަގު ކުޑަކޮށްފައެވެ.އޮއްފޮގެ ލަނޑާއި އެކު ނިއުއިން މެޗުގެ ކުޅުން އިތުރަށް ވަރުގަދަކޮށް ވަނީ މިދިޔަ ސީޒަންގައި ޓީސީއަށް ކުޅުނު އަދި ރާއްޖޭގެ އެންމެ މޮޅު ކުޅުންތެރިޔާގެ މަގާމު ހޯދި އަލީ ފާސިރު (ސެންޓޭ) ލަނޑުން މެޗުގެ ނަތީޖާ ހަމަހަމަ ކޮށްފައެވެ. އޭނާ މި ލަނޑު ކާމިޔާބުކޮށްފައިވަނީ ޓީސީގެ ކުޅުންތެރިއަކު އަލީ އަޝްފާގް (ދަނގަޑޭ)އަށް ކުރި ފައުލަކާ ގުޅިގެން ލިބުނު ޕެނަލްޓީއެއްގައެވެ.
12 ވަނަ ފަހަރަށް އެފްއޭ ކަޕު އުފުލާލި ނިއުއަކީ މި މުބާރާތުގައި އެންމެ ކާމިޔާބު ކުލަބް ގެ އިތުރުން ދިވެހި ފުޓުބޯޅައިގައިވެސް އެންމެ ކާމިޔާބު ކުލަބެވެ. ދިވެހި ޕުރިމިއާ ލީގު ކާމިޔާބުކުރި ނިއުވެސް އަދި ދެވަނައަށް ދިޔަ ޓީސީ އަށްވެސް ވަނީ އަންނަ އަހަރުގެ އޭއެފްސީ ކަޕުން ޖާގަ ލިބިފަ އެވެ
