ގާސިމު އެހެން ވިދާޅުވީ ކުރިއަށް އޮތް އިންތިހާބުގެ ކެމްޕޭނަށް ފުވައްމުލައް ސިޓީއަށް ވަޑައިގެން އެ ސިޓީގައި މިއަދު ވާހަކަ ދައްކަވަމުންނެވެ.
ޤާސިމް ވަނީ ޕީޕީއެމް އަދި އެމްޑީޕީ އަށް ތާއީދުނުކުރައްވާ ސަބަބުވެެސް ހާމަކޮށްފައެވެ. އެގޮތުން ގާސިމް ވިދާޅުވީ އެމްޑީޕީއާއި ޕީޕީއެމް ވެރިކަމަށް ގެންނަން މީގެ ކުރިން ތިން ފަހަރެއްގެ މަތިން ތާއީދު ކުރެވިއްޖެ ކަމަށާއި ނަމަވެސް ކޮންމެ ފަހަރަކު ވެސް ވެރިކަމަށް އައުމަށްފަހު ގާނޫނުތަކާއި ހިލާފުވެ ރައްޔިތުންނަށް ހިޔާނާތްތެރިވެފައިވާ ކަމަށެވެ.
އެހެންކަމުން މިފަހަރު މިއީ އެމަނިކުފާނަށް ފުރުސަތު ދެއްވަން ވީ ފަހަރު ކަމަށާއި ޕީޕީއެމާއި އެމްޑީޕީއަށް ދެން ތާއީދު ކުރެވެން ނެތް ކަމަށް މާފާއި އެކު ދަންނަވާކަމަށް ގާސިމު ވިދާޅުވިއެވެ. ގާސިމް އިތުރަށް ވިދާޅުވީ ޕީޕީއެމް އަދި އެމްޑީޕީ އަކީވެސް ފެއިލްވެފައިވާ ދެ ޕާޓީ ކަމަށެވެ.
އެމްޑީޕީއާއި ޕީޕީއެމަށް ތާއީދު ކުރެވެން ނެތް ކަމަށް ގާސިމު މި ވިދާޅުވީ އެމްޑީޕީ ކޯލިޝަންގައި ހިމެނޭ އެމްޑީއޭގެ ރައީސް އަހުމަދު ސިޔާމުއާއި އަދާލަތުގެ ރައީސް އިމްރާން އަބްދުﷲ ވަނީ އެކޯލިޝަނާ ގުޅިވަޑައިގެންނެވުމަށް ގާސިމަށް ގޮވާލައްވާފައިވާ ދަނޑިވަޅެއްގައެވެ.
