17 ނޮވެމްބަރުގެ ކުރިން އާރްއެސްޑަބްލިޔު ފެސިލިޓީއަށް އެދޭ ދޯނިތަކުގެ އިވޭލުއޭޝަން ފުރިހަމަކޮށް ފައިސާ ދޫކުރުމަށް ފިޝަރީސް މިނިސްޓްރީ އާއި އެސްޑީއެފްސީގެ ޓީމުން މަސައްކަތް ކުރަމުންދާކަމަށް ފިޝަރީސް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ފަރުމަހުގެ މަސްވެރިކަމުގެ ސިނާޢަތު ތަރައްގީކުރުމުގެ ގޮތުން ދޫކުރާ ލޯނު ލިބުނު ފަރާތްތަކާއެކު ބޭއްވި ބައްދަލުވުމެއްގައި ދެއްކެވި ވާހަކަފުޅުގައެވެ. މިނިސްޓަރު ވިދާޅުވީ މި ފެސިލިޓީއަކީ ސަރުކާރަކުން މިހާތަނަށް އޮޑިވެރިންނަށް ހުޅުވާލާފައިވާ އެންމެ ފަހި ފުރުސަތު ކަމަށެވެ. ޝިޔާމް ވިދާޅުވި ގޮތުގައި ސަރުކާރުގެ އަމާޒަކީ މަސްވެރިން ބާނާ މަސް ތާޒާކަންމަތީގައި ބެހެއްޓުމަށް އޮޑިވެރިންނަށް އެހީތެރިކަން ފޯރުކޮށްދިނުން ކަމަށެވެ.

AD

މި ފެސިލިޓީގެ ސަބަބުން އޮޑިވެރިންނަށް ލިބޭނެ ފައިދާތަކުގެ ތެރޭގައި %35 ޑިސްކައުންޓެއް ލިބިގެންދާނެ ކަމަށާއި، 2 މިލިއަން ރުފިޔާއާ ހަމައަށް ރަހުނަކާ ނުލައި ފެސިލިޓީ ހަމަޖެހިގެންދާނެ ކަމަށް ވަޒީރު ފާހަގަކުރެއްވިއެވެ. މީގެ އިތުރުން، އާރްއެސްޑަބްލިޔު ސިސްޓަމާއެކު ބޭނުން ސައިޒެއްގެ ޖަނަރޭޓަރެއްވެސް ގަނެވޭނެ ކަމަށާއި، ފެސިލިޓީއަށް 6 މަސްދުވަހުގެ ގްރޭސް ޕީރިއަޑެއް ލިބިގެންދާނެ ކަމަށް ވަޒީރު ވިދާޅުވިއެވެ. އަދި ފެސިލިޓީ އަނބުރާ ދެއްކުން 10 އަހަރަށް ބަހާލެވޭނެ ކަމަށްވެސް މިނިސްޓަރު ހާމަކުރެއްވިއެވެ.

މި މަޝްރޫއުގެ ދަށުން 700،000ރ. އިން ފެށިގެން 2،000،000ރ. އާ ހަމައަށް ލޯނު ދޫކުރާނެ ކަމަށެވެ. ލޯނަށް އެދުމުގެ ފުރުސަތު ހުޅުވާލާފައި ވަނީ ނޮވެމްބަރު 30 ގެ ނިޔަލަށެވެ.