އަންނަ މަހު ބާއްވާ ރިޔާސީ އިންތިހާބުގައި ތިން ސިޓީއެއްގެ ކޮމްޕްލެއިންޓްސް ބިޔުރޯގައި މަސައްކަތްކުރާނެ މެންބަރުން ހޯދުމަށް އިލެކްޝަންސް ކޮމިޝަނުން އިއުލާންކޮށްފިއެވެ/
އީސީ އިން ކުރި އިއުލާނުގައި ވަނީ އެ ކޮމިޝަނުން މީގެ ކުރިން ކުރި އިއުލާނަށް އެކަށީގެންވާ ވަރަށް މެންބަރުން ލިބިފައި ނުވުމާއެކު އައްޑޫ ސިޓީ، ފުވައްމުލައް ސިޓީގެ އިތުރުން ކުޅުދުއްފުށީގައި ކޮމްޕްލެއިންޓްސް ބިޔުރޯއަށް މެންބަރުން ބޭނުންވާކަމަށެވެ. މި ގޮތުން ކޮންމެ އަތޮޅެއްގެ އަތޮޅު ކޮމްޕްލެއިންޓްސް ބިޔުރޯއަށް އިސް އެއް މެންބަރަކާއި އާންމު 2 މެންބަރުންނާ އެކު ޖުމްލަ 3 މެންބަރުން ބޭނުންވާކަމަށް އީސީ އިން ވަނީ ބުނެފައެވެ.
މި މަސައްކަތްތަކަށް ޝައުގުވެރިވާ ފަރާތްތަކުން އޮގަސްޓު 17، 2023 ވާ ބުރާސްފަތި ދުވަހުގެ 15:00 ގެ ކުރިން ހުށަހެޅުމަށް އީސީ އިން ވަނީ އެދިފައެވެ.
އީސީ އިން ބުނީ ކޮމްޕްލެއިންޓްސް ބިޔުރޯގެ މެންބަރުން މަސައްކަތް ކުރަންޖެހޭނީ ރިޔާސީ އިންތިހާބުގެ ވޯޓުލުން އޮންނަ ދުވަހުގެ 10 ދުވަސް ކުރިން ފެށިގެން އިންތިހާބު ނިމި 7 ދުވަސް ވަންދެން ކަމަށެވެ. އަދި މިމުއްދަތުގެ ފަހުންވެސް އިންތިހާބުގެ މަސައްކަތާއި ގުޅިގެން މުއްދަތު އިތުރު ކުރަން ޖެހޭނަމަ، މުއްދަތު އިތުރު ކުރާނެ ކަމަށް އީސީ އިން ވަނީ ބުނެފައެވެ.
