އަހަރުމެންގެ ތެރެއިން ބައެއް މީހުން ފާފައާއި މެދު ދެކެނީ ވަރަށް ލުއި ގޮތަކަށް ކަމަށާއި ދުންޔަވީ މަންފާއަށްޓަކައި ފާފައެއް ކުރުމަށް ޖެހިލުން ނުވާ ކަމަށް މިއަދުގެ ހުކުރު ޚުތުބާގައި ބުނެފިއެވެ.
“ފާފައިގެ އަޘަރު” މި މައުޟޫގައިވާ ޚުތުބާގައި ބުނީ ބޮޑެތި ފާފަތަކަށް ވެސް އަރައިގަންނަނީ ކަމަށާއި ބަނގުރާ ބުއިމާއި މަސްތުވާތަކެތި ބޭނުން ކުރަނީ ވެސް އެއްވެސް ޖެހިލުމެއް ނެތި ކަމަށެވެ. އަދި ޒިނޭ ކުރުމާއި ވައްކަން ކުރުމާއި ރިބާ ކެއުމާއި ޖުވާ ކުޅެނީ ވެސް ބިރެއް ނެތި ކަމަށެވެ.
މީގެ އިތުރުން މީހުން މެރުމާއި ސިހުރު ހެދުމާއި ޣީބަ ބުނުމާއި ނެތި މޮށުމާއި ފުރައްސާރަ ކުރުމާއި މަލާމާތް ކުރުން ވެސް އިންތިހާއަށް ގޮސްފައިވާ ކަމަށާއި ޢިއްފަތް ފޭރުން ފަދަ ކަންކަމަށް މީހުން އަރައިގަންނަނީ އެއްވެސް ބިރެއް ނެތި ކަމަށް ވެސް ޚުތުބާގައި ވަނީ ބުނެފައެވެ. އަދި މުޖުތަމައުގެ އާންމު މިންގަނޑާއި ޚިލާފުވިޔަސް ހެދުން އަޅަނީ ބޭނުން ގޮތަކަށް ކަމަށް ވެސް ބުނެފައި ވެއެވެ.
ޚުތުބާގައި ބުނީ ފާފަކުރުމަށްފަހު، އެކަމަށް ފަޚުރުވެރިވެ، އެވާހަކަ ދައްކާ މީހުން ވެސް މަދު ނޫން ކަމަށާއި އެއީ ނުބައިކަން ބޮޑުވެގެންވާ އަމަލެއް ކަމަށެވެ.
ފާފައިގެ ސަބަބުން މުޅި މުޖުތަމައު ނުރައްކަލަކަށް ހުށަހެޅޭ ކަމަށާއި ދިރިއުޅުމުގެ ހަޔާތް ނާމާންވެ، ބިންމަތި ފަސާދަވާ ކަމަށް ވެސް ޚުތުބާގައި ބުނެފައި ވެއެވެ. އަދި މުޖުތަމައުގައި ބިރުވެރިކަން އުފެދޭ ކަމަށް ވެސް ބުނެފައި ވެއެވެ.
ޚުތުބާގައި ބުނީ ފާފައަކީ އޭގެ ސަބަބުން މާތްﷲ ގެ ކޯފާއާއި އަޒާބަށް ހުށަހެޅޭ ކަމެއް ކަމަށާއި އަމަން އަމާންކަން ގެއްލި، ބިރުވެރިކަމާއި ނާމާންކަން ފެތުރޭ ކަމަށެވެ.
