އައްޑޫސިޓީގައި މީގެ ކުރިން އޮޕަރޭޓް ކުރަމުން އަންނަ ޝަންގްރިއްލާ ރިސޯޓު އަލުން އޮޕަރޭޝަނަށް ގެނެވޭނެ ސީދާ ތާރީޚެއް ޓޫރިޒަމް މިނިސްޓަރު ޑރ. އަބްދުﷲ މައުސޫމަށް ވިދާޅުނުވެވުމުން އެ ކަމާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނުރުހުން ފާޅުކުރައްވައިފިއެވެ.
ނަމަވެސް އެ ރަށް ހުޅުވޭނެ ސީދާ ދުވަހެއް މައުސޫމް ވިދާޅެއް ނުވެއެވެ.
“ޕްރައިވެޓް ވިޔަފާރިއެއް. ސަރުކާރުން ކޮށްދިން އެންމެ ބޮޑު ކަންތައް ކޮށްދީފި. އެއީ ކުލި ވަރަށް ކުޑަކޮށްދީފި. ދެން ސަރުކާރުގަ އޮތް ޝެއާ ދޫކޮށްލުމުގެ މަޝްވަރާތައް ނިމި އައްޑޫ ސިޓީގެ އިއްޒަތްތެރި މަޖިލިސް މެމްބަރުންނާއި ކައުންސިލް މެމްބަރުން ޝާމިލުވާ ގޮތަށް ވާހަކަ ދެކެވިފައިވަނީ،” މެމްބަރުގެ ސުވާލާ ގުޅިގެން މިނިސްޓަރު ވިދާޅުވިއެވެ.
މިނިސްޓަރ ގެ މި ޖަވާބާއި ގުޅިގެން ރައީސް ނަޝީދު ވިދާޅުވީ އެކަން ވާން އޮތީ ސަރުކާރުގެ ޝެއަރ ދޫކުރުމުން ކަން މިނިސްޓަރަށް ވެސް އެބަ އެނގިވަޑައިގަންނަވާ ކަމަށެވެ. އަދި ހިއްސާ ދޫކުރުމުގެ މައްސަަލަ އޮތީ ހުއްޓިފައިކަމާއި އެކަން ވާނީ ކޮން އިރަކުންތޯ ނަޝީދު ވަނީ ސުވާލު އުފައްދަވާފައެވެ.
“ކޮން އިރަކުންތޯއޭ ހިއްސާ ދޫކުރެވޭނީ. ކާކުތޯއޭ އެއްބަސްނުވެގެން އުޅެނީ. އަޅުގަނޑު ދެކޭގޮތުގައި ޝަންގްރިއްލާގެ މައްސަލަ މި މަޖިލީހުގައި ތަކުރާރުކޮށް އެބަ ސުވާލުކުރައްވާ. އެއަށް އެކަށީގެންވާ ޖަވާބެއް ލިބޭތަނެއް އަޅުގަނޑަކަށް ނުފެނޭ،” ރައީސް ނަޝީދު ވިދާޅުވިއެވެ.
މިނިސްޓަރު ވިދާޅުވީ ޝަންގްރިއްލާގެ ހިއްސާ ސަރުކާރުން ދޫކުރަން ނިންމި ނިންމުން އެ ރިސޯޓު ހިންގާ ކުންފުންޏާ ހިއްސާކޮށްފައިވާކަމަަށެވެ. އެ ކުންފުނިން ޖަވާބުދިނުމާއެކު ޝަންގްރިއްލާގެ މަސައްކަތް ފެށޭނެކަމަށް މައުސޫމް ވިދާޅުވިއެވެ.
ޝަންގްރިއްލާ މި އަހަރު ހުޅުވޭނެ ކަމަށް ރައީސް އިބްރާހިމް މުހައްމަދު ސޯލިހުވެސް މިދިޔަ މަހު ފަހުކޮޅު ވަނީ ވިދާޅުވެފައެވެ. ރައީސް ވިދާޅުވީ އެ ރަށް އަލުން ހުޅުވާނީ އޮގަސްޓު ނޫނީ ސެޕްޓެމްބަރު މަހު ހާ ހިސާބުގައި ކަމަށެވެ.
