އިންޓަރ ސްކޫލް އެތުލެޓިކްސް މީޓް 2023 ގައި އުމުރުން 19 އަހަރުން ދަށުގެ އަންހެން ކުދިންގެ އުމުރުފުރާގައި ވާދަކޮށް 27 އަހަރުވީ ޤައުމީ އަންހެން ހައިޖަމްޕް ރިކޯޑު މުގުރާލި އައްޑޫ ހައި ސްކޫލްގެ އެތުލީޓު އައިޝަތު ޝައިމް އަޒީޒް އަށް އޭނާ ވާދަކުރި އުމުރުފުރާގެ އެންމެ މޮޅު އަންހެން އެތުލީޓުކަން ލިބިއްޖެއެވެ.
ފުވައްމުލައް ސިޓީގައި މި މަހުގެ 4 އިން 10 ގެ ނިޔަލަށް ކުރިއަށް ގެންދެވުނު މި މުބާރާތުގައި ޝައިމް ވަނީ 3 އިވެންޓެއްގައި ބައިވެރިވެ އޭނާ ބައިވެރިވި 3 އިވެންޓުންވެސް ރަން މެޑަލް ހޯދައިފައެވެ. އެއީ ޖެވެލިން ތުރޯ، ލޯންގް ޖަމްޕް އަދި ހައި ޖަމްޕެވެ. ހައި ޖަމްޕުގައި 1.50 މީޓަރު މަތިން ފުންމާ ހައި ޖަމްޕުގެ ޤައުމީ އާ ރިކޯޑެއް ޝައިމް ހަދައިފައިވާއިރު ލޯންގު ޖަމްޕުގައި އޭނާ ވަނީ މުބާރާތުގެ ރިކޯޑެއް ހަދައިފައެވެ.
ޝައިމް ވާދަކުރި އުމުރުފުރާގެ އިތުރުން 15 އަހަރުން ދަށުންނާއި، 17 އަހަރުން ދަށުން ވެސް ވަނީ އެންމެ މޮޅު އަންހެން އަދި ފިރިހެން އެތުލީޓުން ހޮވާފައެވެ.
