އައްޑޫ ސިޓީ ހުޅުދޫގައި މިހާރު ކުރިއަށް ދާ “ރަސްރަނި ނެޓްބޯޅަ ޗެލެންޖް”ގެ ފައިނަލަށް ފެނަކަ ކޯޕަރޭޝަން އާއި ހުޅުދޫ ޔޫތު ފެލްކޯން ދަތުރުކޮށްފިއެވެ.
މި މުބާރާތުގެ ފައިނަލްގެ ޖާގަ ފެނަކައިން ޔަގީންކުރީ އެމްޓީސީސީ އާއި ދެކޮޅަށް ކުޅުނު ސެމީފައިނަލްގެ ފުރަތަމަ މެޗު ކާމިޔާބުކޮށްގެންނެވެ. ހުޅުދޫ ރަސްމީ ދަނޑުގައި ކުޅުނު މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެން ދިޔައިރު ފެނަކައިން މެޗު ކާމިޔާބުކުރީ 18-20 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ އައިޝަތު ސަވާ އިބްރާހީމްއެވެ.
ސެމީ ފައިނަލުގައި އިއްޔެ ކުޅުނު މެޗުގައި މިފްކޯ އާއި ހުޅުދޫ ޔޫތު ފެލްކޯން ބައްދަލުކުރި މެޗު ކާމިޔާބުކުރީ ހުޅުދޫ ޔޫތުންނެވެ. މި މެޗު އެ ޓީމުން ކާމިޔާބުކުރީ 24-27 އިންނެވެ. ފޯރިގަދަ މި މެޗުގެ މޮޅު ކުޅުންތެރިއަކަށް ހޮވިފައިވަނީ މަމްޝޫދާ ޒާހިރު އެވެ.
