ހ. ޝީރީންވިލާގައި އަނިޔާވެރި ގޮތަކަށް މަރަލާފައި ވާ ޏ. ފުވައްމުލަކު، ކުރި، ޝިއާއު މުޙައްމަދު ސަޢީދުގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ފޮނުވާލައިފިއެވެ.
މިދިޔަ ހޮނިހިރު ދުވަހުގެރޭ ހިނގި މި ހާދިސާ އާއި ގުޅިގެން މަޝްހޫރު ސްކޭޓަރު، ފ. ނިލަންދޫ ފިނިފެންމާގޭ އުމުރުން 22 އަހަރުގެ އަލީ ޝާހިލް ވަނީ ހައްޔަރުކޮށްފައެވެ. އަދި މި މައްސަލައާއި ގުޅޭ މައުލޫމާތު ހާމަކުރުމަށް ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ ޝާހިލް ކުށަށް އިއުތިރާފްނުވާކަމަށްވެސް ބުނެފައެވެ.
މި ނޫސްވެރިންގެ ބައްދަލުވުމުގައި ޝިއާއުގެ ހަށިގަނޑުގެ ޕޯސްޓްމޯޓަމް ހަދަން ނިންމާފައިވާ ކަން ފުލުހުން ހާމަކޮށްފައިވާއިރު، މިއަދުގެ ވަގުތެއްގައި ޝީއާއުގެ ހަށިގަނޑު ރާއްޖެއިން ބޭރަށް ފޮނުވާލާފައިވާކަމަށް ފުލުހުން ވަނީ ބުނެފައެވެ. އެހެންނަމަވެސް ޝީއާއުގެ ހަށިގަނޑު ޕޯސްޓްްމޯޓަމް ހެދުމަށްޓަކައި ފޮނުވާލީ ކޮން ގައުމަކަށް ކަން ފުލުހުން ހާމަކޮށްފައި ނުވާއިރު، މީގެ ކުރިން ފުލުހުން ވަނީ މި މައްސަލައާއި ގުޅޭ ގޮތުން އިތުރު މައުލޫމާތު ހިއްސާކުރެވެނީ ޕޯސްޓްމޯޓަމް ހެދުމަށް ފަހު ކަމަށް ބުނެފައެވެ.
ރާއްޖޭގައި މިހާތަނަށް ހިންގި އެންމެ ރަހުމުކުޑަ ގަތުލުއާންމާއި އެކު ރާއްޖޭގައި އިސްލާމީ ޝަރީއަތް ގާއިމުކުރުމަށް ގޮވާލާ އަޑުވަނީ ގަދަވެފައެވެ.
