ހުވަދުއަތޮޅު އުތުރުބުރީ ވިލިގިލީ ކައިރީގައި އޮންނަ ފަޅުރަށަކަށް މޫދަށް ގޮސްއުޅެނިކޮށް ގެނބިގެން މަރުވި ފުލުސް މީހާ މިރޭ މާލެ ގެންނަ ގޮތަށް ހަމަޖެހިފައިވާ ކަމަށް ފުލުހުން ވިދާޅުވެއްޖެވެ.
މިހާދިސާގައި ނިޔާވެފައިވަނީ ޕޮލިސް ކޮންސްޓަބަލް މުހައްމަދު ހަނީފެވެ. އޭނާ ނިޔާވީ އޭނާގެ އަންހެނުންނާއެކު މިއަދު ހެނދުނު މޫދަށްގޮސް އުޅެނިކޮށް ގެނބިގެންނެވެ. އޭނާ ނިޔާވިޔަސް އަންހެނުންވަނީ ސަލާމަތްވެފައެވެ. އަންހެނުންނަށް ފަތަން ނޭގުނަސް އޭނާ ސަލާމަތްވެފައިވަނީ ދެގަޑިއެއްހާއިރު ބަކަތެޅުމަށްފަހު ކަމަށް އޭނާއާ ހަވާލާދީ ބައެއް ނޫސްތަކުގައި ބުނެފައިވެއެވެ.
ހަނީފް ގެނބިގެން އުޅޭކަމުގެ މައުލޫމާތު ލިބިގެން އެނާ ސަލާމަތްކުރަން ދިޔަ ފުލުހަކުވަނީ އެކްސިޑެންޓެއްވެ ސީރިއަސް އަނިޔާތަކެއް ލިބިފައެވެ. ހަނީފާއެކު މިރޭ އޭނާވެސް މާލެ ގެނައުމަށްވަނީ ހަމަޖެހިފައި ކަމަށް ފުލުހުން ވިދާޅުވިއެވެ. އެހެންނަމަވެސް އެމީހުން ގެނައުމަށް ހަމަޖެހިފައިވާ ގަޑިއެއް ނޭނގެއެވެ.
އެކްސިޑެންޓްވި ފުލުސް މީހާ މާލެ ގެންނަނީ އިތުރު ފަރުވާއަށް ކަމަށް އެނގިފައިވެއެވެ. ހަނީފް ގެންނަނީ ކީއްކުރަން ކަމެއް ފުލުހުން ވިދާޅެއް ނުވެއެވެ.
