އައްޑޫ ސަރަހައްދީ ޕޯޓުގެ، އެކްސްޕޭންޝަން މަރުހަލާގެ ފުރަތަމަ ފިޔަވަހީގެ މަސައްކަތް ނިމި ބޮޑެތި ބޯޓުފަހަރަށް އެ ފާލަމަށް ކައިރިކޮށް މުދާ ބޭލޭނެ އިންތިޒާމު، 2023 ވަނަ އަހަރުގެ ޖުލައި މަހުގެ ތެރޭގައި ހަމަޖެހިގެންދާނެކަމަށް އެމްޕީއެލްއިން ބުނެފި އެވެ.
އެމްޕީއެލްއިން ބުނީ އެ މަސައްކަތް ހަވާލުކޮށްފައިވާ ކުންފުނި، އެމްޓީސީސީން މިހާރު ކުރަމުން އަންނަނީ އީއައިއޭގެ މަސައްކަތް ކަމަށެވެ. އަދި އަންނަ އަހަރުގެ ޖުލައި މަހުގެ ތެރޭގައި ފޭސް އެކެއްގެ މަސައްކަތް ނިމޭނެކަމަށް އެމްޕީއެލް އިން ވަނީ ބުނެފައެވެ. ފޭސްއެކެއްގެ މަޝްރޫއުގެ ދަށުން މަގަތު ފާލަން މިހާރު އޮތްތަނުން، އެހެންތަނަކަށް ބަދަލުކޮށް ބޮޑުކުރުމުގެ އިތުރުން ބިން ހިއްކައި، ބްރޭކްވޯޓާ ގެ މަސައްކަތް ނިންމުމަށް ވަނީ ހަމަޖެހިފައެވެ.
އެމްޕީއެލް އިން ބުނީ ޕޯޓަށް ބޭނުންވާ އިކުއިޕްމަންޓްސް ގަންނަން މިހާރު ހަވާލުކޮށްފައިވާ ކަމަށާއި މިއަހަރު ފަހުކޮޅު ނުވަތަ އަންނަ އަހަރު ކުރީކޮޅު އެތަކެތި ލިބޭނެކަމަށެވެ. އަދި މިހާރުވެސް ޕޯޓުގެ މަޝްރޫއާއި ގުޅިގެން މުވައްޒަފުން ތަމްރީނުކުރަމުން އަންނައިރު ޕޯޓު މަސައްކަތް ނިންމާ، އެ ކުންފުންޏާއި ހަވާލުވުމާއެކު އޮޕަރޭޝަންސްތައް ފެށިގެންދާނެކަމަށް އެމްޕީއެލް އިން ވަނީ ބުނެފައެވެ.
