އަވަށްޓެރި ޕާކިސްތާންގެ އުފެއްދުންތައް ދައްކާލުމަށް އެއްހާހަށް ވުރެ ގިނަ ފޮޓޯއާއެކު ވަރޗުއަލް ގެލެރީއެއް އިފްތިތާހު ކޮށްފި އެވެ.މިއީީ ޓްރޭޑް ޑެވެލޮޕްމެންޓު އޮތޯރިޓީ އޮފް ޕާކިސްތާން (ޓީޑީއޭޕީ) އިން ތައްޔާރުކޮށްފައިވާ ޕާކިސްތާންގެ ވާޗުއަލް އެކްސްޕޯޓް ގެލެރީ އެކެވެ.
އެގައުމުގެ އުފެއްދުންތައް ވީހާވެސް ގިނަ ބަޔަކަށް ދައްކާލުމުގެ މަގްސަދުގައި އިފްތިތާހު ކުރި މި ގެލަރީގައި 66 އުފެއްދުމުގެ އެއްހާހަށް ވުރެ ގިނަ ހައި ރިޒޮލިއުޝަން ފޮޓޯ އަޕްލޯޑްކޮށްފައި ވެއެވެ. މީގެތެރޭގައި އެޤައުމުގައި އުފައްދާ ހިފައިގެންގުޅޭ ސާމާނާއި އަންނައުނާއި ފޭރާމުގެ ބާވަތްތަކާއި ދަނޑުވެރިކަމުގެ އުފެއްދުންތަކާއި، ކާބޯތަކެއްޗާއި، ލެދަރ، އިންޖިނިއަރިންގ، މިނެރަލް އަދި ބޭސްވެރިކަމުގެ އުފެއްދުންތަކުގެ ފޮޓޯތައް ހިމަނާފައިވެއެވެ.
މި ފޮޓޯތަކާއެކު ކޮންމެ އުފެއްދުމަކާ ގުޅޭ މުހިއްމު މައުލޫމާތުތައް ވެސް ހިމަނާފައި ވެއެވެ. ޕާކިސްތާން އެކްސްޕޯޓް ގެލަރީ ވެބްސައިޓް ފަރުމާކޮށްފައިވަނީ ޒިޔާރަތްކުރާ ފަރާތްތަކަށް ފަސޭހަވާނެހެން ކެޓަގަރީތައް ވަކިކޮށް ކޮންމެ އައިޓަމެއްވެސް ވަކިން ބަލާލެވޭ ގޮތަށެވެ.
މުޅިން އަލަށްފެށި މި ވެބްސައިޓުގައި ކަސްޓަމަރުން ބޭނުންވާ ކޮންމެ ސުވާލެއްވެސް ވަގުތުން ކުރެވޭގޮތަށް ލައިވް ޗެޓް ފީޗަރ ވަނީ ގާއިމްކޮށްފައެވެ. އެގޮތުން ވެބްސައިޓް މެދުވެރިކޮށް އޯޑާރ ކުރަން ބޭނުންވާ ތަކެއްޗާއިގުޅޭ ގޮތުން ހުށަހަޅާ ސުވާލުތަކަށް ދުވަހުން ދުވަހަށް ޖަވާބު ލިބޭނެކަމަށް ޓްރޭޑް ޑެވެލޮޕްމަންޓް އޮތޯރިޓީ އޮފް ޕާކިސްތާނުން މަޢުލޫމާތު ދެއެވެ.
މި ވެބްސައިޓުން ރާއްޖޭ ގެ ވިޔަފާރިވެރިންނަށްވެސް ފަސޭހަކަމާއެކު ވިޔަފާރި ކުރުމަށް ފުރުސަތު ހުޅުވިގެންދާނެއެވެ. ރާއްޖެއާއި ގާތްގުޅުމެއް އޮންނަ ޕާކިސްތާނަކީ ރާއްޖޭގެ ވިޔަފާރިވެރިން މިހާރުވެސް ބައެއް ބާވަތްތަކުގެ މުދާ އެތެރެކުރާ ޤައުމެކެވެ. އެގައުމުން ގެންނަ ހިކި މޭވާއާއި ނަޓްސް ފަދަ ތަކެއްޗަކީ ދިވެހިންނަށް ކަމުދާ ސްޓޭންޑެޑަށް ހުންނަ ރަހަމީރު ބާވަތްތަކެކެވެ.
