އަކްޝޭ ކުމާރުގެ ސްޕައި ތްރިލަރ ފިލްމު “ބެލް ބޮޓަމް” ތިން ގައުމެއްގައި ދެއްކުން މަނާކޮށްފިއެވެ.
އަކްޝޭގެ ފިލްމު ދެއްކުން މަނާކޮށްފައިވާ ތިން ގައުމަކީ ސައުދި އަރަބިއްޔާ އާއި ގަތަރާއި ކުވައިތެވެ. ބޭރުގެ މީޑިއާ ރިޕޯޓުތައް ބުނާ ގޮތުގައި މި ތިން ގައުމުގައި މި ފިލްމު ދެއްކުން މަނާކުރީ ހަގީގީ ހާދިސާގެ މައްޗަށް ކުޅެފައިވާ މި ފިލްމުގެ ބައެއް މަންޒަރުތައް އޮޅުވާލާފައިވާކަމަށް ބުނެއެވެ.
ކޮވިޑް19 ގެ ދެވަނަ ރާޅަށް ފަހު އިންޑިއާގެ ބޮޑު ސްކްރީންގައި އަޅުވާ ފުރަތަމަ ފިލްމަށް ބެލްބޮޓަމް ވެގެން ދިޔައިރު މި ފިލްމުގައި ފެނިގެންދާނީ 1980 ގެ އަހަރުތަކުގައި ހިނގާފާއިވާ ހާދިސާތަކެކެވެ.
ބޮލީވުޑްގެ މަޝްހޫރު ތަރި އަކްޝާ ކުމާރްގެ އިތުރުން ވާނީ ކާޕޫރު އާއި ލާރާ ދައްތާ އަދި ހުމާ ގުރައިޝީވެސް ފެނިގެންދާ މި ފިލްމުގައި 1984 ވަނަ އަހަރު ލާހޫރުން ދުބާއި އަށް ދިޔަ ފްލައިޓެއް ހައިޖެކްޓު ކުރާ މަންޒަރު ފެނިގެންދާ އިރު އެ ހާދިސާ ވަރަށް ބޮޑަށް އޮޅުވާލާފައިވާކަމަށް މެދުއިރުމަތީގެ ބައެއް ގައުމުތަކުން ވަނީ ބުނެފައެވެ.
މި ގޮތުން ފްލައިޓް ހައިޖެކްޓު ކުރި ހަގީގީ ހާދިސާގައި އެމީހުންގެ އަތުން ފްލައިޓް ހޯދުމުގެ އޮޕަރޭޝަންގައި އިސްކޮށް ދުބާއީގެ އޭރުގެ ޑިފެންސް މިނިސްޓަރު ޝެއިހް މުހައްމަދު ބިން ތާޝިދް އަލް މަހްތޫމް އާއި ދުބާއީ ސަރުކާރުން އިސްދައުރެއް އަދާކޮށްފައިވާއިރު، މި ފިލްމުގައި ފެންނަގޮތުން އެ ހާދިސާގައި ފްލައިޓް ސަލާމަތްކުރުމަށް ހުރިހާ މަސައްކަތެއްކޮށްފައިވަނީ އިންޑިއާ ސިފައިންނާއި އެމީހުންގެ އިސް އޮފިޝަލުންނެވެ. އެހެންކަމުން މިއީ ތާރިހު އޮޅުވާލުމުގެ އަމަލެއްގެ ގޮތުގައި ގިނަ ބަޔަކު ވަނީ ސިފަކޮށްފައެވެ.
