ދަނޑުވެރިކަމާއި ބެހޭ ވުޒާރާގެ ބެލުމުގެ ދަށުގައި އޮތް ތިން ރަށެއް ކަމުގައިވާ ހއ. މުލިދޫ، ލ. ގާދޫ އަދި ގދ. ގަން، އެގްރޯ ނެޝަނަލް ކޯޕަރޭޝަން ލިމިޓެޑުން ކުރިއަށްގެންދާ ދަނޑުވެރިކަމުގެ މަޝްރޫޢު ހިންގުމަށް ދޫކުރާ ގޮތަށް ސަރުކާރުން ނިންމައިފިއެވެ.

އެގްރޯ ނެޝަނަލް ކޯޕަރޭޝަން ލިމިޓެޑަށް ސަރުކާރުން ދޫކުރުމަށް ނިންމަވާފައިވާ ތިން ރަށުގެ މަޢުލޫމާތު ތަފާތު އެކި ގޮތް ގޮތަށް މީސް މީޑިއާގައި ދައުރުވަމުން ދާތީ އެކުންފުނިން މިއަދު ނެރުނު ނޫސްބަޔާނެއްގައި ބުނެފައިވާ ގޮތުން ހއ. މުލިދޫ، ލ. ގާދޫ އަދި ގދ. ގަމުގެ ބޮޑުބައި ބޭނުންކުރެވިގެން ދާނީ ކޮންޓްރެކްޓް ފާރމިންގ އުޞޫލުން ދަނޑުވެރިކަން ކުރުމަށް ކަނޑައަޅާފައިވާ ބާވަތްތައް އުފެއްދުމަށް ކަމަށާއި، ކޮންމެ ރަށެއްގައި ވެސް ދަނޑުވެރިކަމަށް ބިންތަކެއް ކަނޑައެޅި ދިގު މުއްދަތަކަށް ދަނޑުވެރިންނަށް ދޫކުރުމަށް ރޭވިފައިވާ ކަމަށް ވެއެވެ.

AD

މިފަދަ ބިންތައް ދޫކުރުމުގައި އެއަތޮޅެއްގެ ދަނޑުވެރިންނަށް، ވަކިން ޚާއްޞަކޮށް މިރަށްތަކާއި ކައިރި ހިސާބުގެ ރަށްތަކުގެ ރައްޔަތުންނަށް އިސްކަންދޭނެ ކަމަށާއި މިމަސައްކަތް ކުރުމުގައި ދަނޑުވެރިންނަށް އެރަށްރަށަށް ދަތުރުކުރެވޭނެ އިންތިޒާމާއި އެރަށްރަށުގައި ތިބެވޭނެ އިންތިޒާމްވެސް އެކުންފުނީގެ ފަރާތުން ހަމަޖައްސައި ދޭނެކަމަށް އެކުންފުނިން ވަނީ ހާމަކޮށްފައެވެ.

މީގެ އިތުރުން މިރަށްތަކުގައި ކަރަންޓާއި ފެނާއި އަސާސީ ޚިދުމަތްތައް ގާއިމްކޮށްދީ ދަނޑުވެރިން ހައްދާ ބާވަތްތައް ރަށުން ގަނެ، ރަށުގައި ރައްކާތެރިކަމާ އެކު ޕްރޮސެސް ކުރެވިގެންދާނެއެވެ. އަދި މިތަކެތި ކައިރި ރަށްތަކަށާއި ރިސޯޓްތަކަށް މާކެޓް ކުރުމުގެ މަސަކަތް ކުރަމުން ގެންދާނީ އެގްރޯނެޓުގެ ފަރާތުންނެވެ. އަދި މި ތިން ރަށުގައި ވެސް ދަނޑުވެރިކަމަށް ބޭނުންކުރާ އާލާތްތަކާއި، ގަސްކާނާ އާއި ބޭހާއި، އެހެނިހެން އިންޕޯޓް ވަޞީލަތްތައް ލިބޭނެ ގޮތަށް އިންތިޒާމް ކުރެވޭނެއެވެ. އަދި، ދަނޑުވެރިންނަށް ދިމާވާ ދަތިތަކަށް ޙައްލު ހޯދައިދީ ދަނޑުވެރިންނަށް ބޭނުންވާ ތަމްރީންތައް އެގްރޯނެޓުގެ ފަރާތުން ފޯރުކޮށްދޭނެއެވެ.

ދަނޑުވެރިންނަށް ދިމާވެފައިވާ ދަތިތަކަށް ދާއިމީ ޙައްލުތައް ހޯދައިދިނުމުގެ މަގްސަދުގައި އެ ކުންފުނިން ކުރިއަށްގެންދާ ކޮންޓްރެކްޓް ފާމިންގ ފުރަތަމަ ފިޔަވަހީގެ ދަށުން 45 ރަށެއްގައި ކޮންޓްރެކްޓް ފާމިންގ (އިންތިޒާމު ކުރެވިގެން ކުރެވޭ ދަނޑުވެރިކަމެއް) ތަޢާރުފުކޮށް، ދަނޑުވެރިކަމުގެ ޢަމަލީ މަސައްކަތް ވަނީ ފެށިފައެވެ. މިހާތަނަށް 1500 އަށް ވުރެ ގިނަ ދަނޑުވެރިން ވަނީ މިމަޝްރޫޢު ގައި ބައިވެރިވުމުގެ ޝައުޤުވެރިކަން ފާޅުކޮށް ފޯމު ހުށަހަޅައި، 400 ފަރާތަކާއި އެކު އެއްބަސްވުންތަކުގައި ސޮއި ކުރެވި، އިތުރު 684 ފަރާތަކާއިއެކު އެގްރިމެންޓް ކުރުމުގެ މަސައްކަތް ކުރެވެމުން އަންނަކަމަށް އެގްރޯނެޓުން މަޢުލޫމާތުދެއެވެ.