ފެނަކަ ކޯޕަރޭޝަންގެ މުދާ ހިފައިގެން، މާލެ އިން ތ. ގުރައިދޫއަށް ދަތުރުކުރަމުންދިޔަ ކޮޅުވެއްޓި އެއް ބަންޑުން ޖަހާލައިފި އެވެ.
އެމްއެންޑީއެފް އިން ވިދާޅުވީ “ޝަފުރާޒް” ނަމަކަށް ކިޔާ ކޮޅުވެއްޓި ބަންޑުން ޖަހާލި އިރު އޭގައި 3 މީހުން ތިބިކަމަށާއި އެމީހުން އެ ސަރަހައްދުން ދަތުރުކުރި ދޯންޏަކަށް ނަގައި ތ. ދިޔަމިގިލި ހެލްތު ސެންޓަރަށް މެންދުރު 1:45 ގައި ގެންގޮސްފައިވާކަމަށެވެ.
ކޮޅުވެއްޓި ބަންޑުން ޖަހާލި ސަރަހައްދުގައި ކޯސްޓްގާޑް ސްކޮޑަރުން ހަރަކާތްތެރިވާން ފަށާފައިވާ ކަމަށް އެމްއެންޑިއެފުން މަޢުލޫމާތު ދެއްވައެވެ. އެއިދާރާއަށް މި ހާދިސާގެ ރިޕޯޓް ލިބިފައިވާ ވަނީ މިއަދު މެންދުރު 1:13 ގައެވެ.
ބަންޑުން ޖަހާލި ކޮޅުވެއްޓި އެހެން އުޅަނދެއްގައި ކަފު ޖަހައިގެން ގުރައިދޫ އަށް ވެއްދުމަށް ދަނީ މަސައްކަތް ކުރަމުންނެވެ.
މިކޮޅުވެއްޓީގައި ހުރީ ފެނަކަ ކޯޕަރޭޝަންގެ ކާގޯގެ ކޮންސްޓްރަކްޝަން މަސައްކަތަށް ބޭނުންވާ ހިލަ އާއި ހިލަވެލި ފަދަ ސާމާނު ތަކެކެވެ.
