އައްޑޫގެ ހުރިހާ އަވަށެއް ގުޅާލުމަކީ އައްޑޫ ސިޓީ ރައްޔިތުންގެ ވިސްނުންކަމަށާއި އެކަމުގެ ސަބަބުން ގިނަ ފަސޭހަތަކެއް ލިބިގެންދާނެކަމަށް އައްޑޫ ސިޓީ މޭޔަރ އަބްދުﷲ ސޯދިގް(ސޯބެ) ވިދާޅުވެއްޖެއެވެ.
އައްޑޫގެ ތަރައްޤީ އާއި ގުޅޭ ގޮތުން ވާހަކަދައްކަމުން ސޯބެ މިއަދު ކުރެއްވި ޓުވިޓެއްގައި ވިދާޅުވީ ފަސޭހަކޮށް ދަތުރުކުރެވޭނެ މަގާއި ބްރިޖު އަދި ސަބްމާރޖްޑް ކްރޮސިން ހަދައި އައްޑޫގެ ހުރިހާ އަވަށެއް ގުޅުވާލުމަކީ އައްޑޫ މީހުންގެ ވިސްނުންކަމަށެވެ. އަދި ފާސްޓް ފެރީ އާއި ރަނގަޅު ބަހާއި މޮނޮރެއިލް ހިމެނޭ ޕަބްލިކް ޓްރާންސްޕޯޓު ނެޓްވޯކަކުން އައްޑޫގެ ހުރިހާ އަވަށެއް ގުޅުވާލެވޭނެކަމަށް ސޯބެ ވަނީ ވިދާޅުވެފައެވެ.
މި ސަރުކާރުން އައްޑޫ ސިޓީގައި ތަރައްޤީގެ ގިނަ މަޝްރޫއުތަކެއް ހިންގާނެކަމުގެ ޔަގީންކަން ދީފައިވާއިރު ސޯބެ ވިދާޅުވީ އެމްޑީޕީގެ މި ސަރުކާރުން އައްޑޫ ތަރައްޤީކުރާނެކަމަށެވެ. އަދި މި ޕްރޮޖެކްޓްތަކުގެ އެއްވެސް ޝަކުވާއެއް އޮތްނަމަ ކަންބޮޑުވުންތައް ހިއްސާކުރުމަށްވެސް ސޯބެވަނީ އެދިފައެވެ.
