އޭވިއޭޝަން ކޮމާންޑުގެ ފަރާތުން ސ. ގަމުގައި ބޭއްވި ޓްރެއިނިންގ އަށް ދިޔަ އަންހެން ކުއްޖާއަކީ ޓެސްޓް ހަދައިގެން ދިޔަ ކުއްޖެއް ނޫން ކަމަށް ހުވަދުއަތޮޅު ދެކުނުބުރީ ތިނަދޫ ކައުންސިލުގެ ރައީސް އަލީ އަމްޖަދު (ދޮނޭ) ވިދާޅުވެއްޖެއެވެ.
މިއަދު ފޭސްބުކްގައި ޢާއްމުކުރި ޕޯސްޓެއްގައި އަމްޖަދް ވިދާޅުވީ އައްޑޫސިޓީގެ މޭޔަރ ޢަބްދުﷲ ސާދިގު (ސޯބެ) ދެއްކެވި ވާހަކަތަކާއި ދެކޮޅަށް އޭވިއޭޝަން ސެކިއުރިޓީ ކޮމާންޑުން ނެރެފައިވާ ބަޔާނަކީ ކަނޑައެޅިގެން ބޮޑު ދޮގެއް ކަމަށެވެ. އަދި ސޯބެ ދެއްކެވީ ރަނގަޅު ވާހަކަތަކެއް ކަމަށާއި އައްޑޫސިޓީއަށް ޓްރެއިނިންގ އަށް ދިޔަ މުވައްޒިފަކީ ޓެސްޓް ހަދައިގެން ދިޔަ މުވައްޒިފެއް ނޫން ކަމަށާއި އެ މުވައްޒަފު އައްޑޫއަށް ފުރި އިރުވެސް އޭނާ ދިރިއުޅޭ ގޭގައި ކޮވިޑް ކޭސް އެއް އޮތް ކަމަށް ވެސް އަމްޖަދުގެ މި ޕޯސްޓުގައި ބުނެފައި ވެއެވެ.
މިމޭރުމުން އަމްޖަދު ވާހަކަފުޅުދައްކަވާފައިވާ ނަމަވެސް މޭޔަރ ނޫސްތަކަށް މަޢުލޫމާތު ދެއްވަމުން ވިދާޅުވެފައި ވަނީ، މި ބަލި އައްޑޫސިޓީއަށް އައި ކަމަށް ލަފާކުރެވެނީ އެ ޓްރެއިނިންގ އަށް ދިޔަ ޓްރެއިނަރުންގެ ފަރާތުން ކަމަށެވެ. އެއްވެސް ވަރަކަށް އެ ޓްރެއިނަރުން އައްޑޫސިޓީއަށް ދިޔައީ ޓެސްޓު ހަދައިގެން ނޫން ކަމަކަށް މޭޔަރ ވިދާޅުވެފައެއް ނުވެއެވެ.
އެކި ނޫސްތަކުން މޭޔަރުގެ ވާހަކަ އެކިގޮތަށް މާނަކޮށްގެން ނެރެމުން ދިޔަ ހަބަރުތަކާއި ގުޅިގެން އޭވިއޭޝަން ސެކިއުރިޓީ ކޮމާންޑުން 06 ފެބްރުއަރީ ގައި ނެރުނު ނޫސްބަޔާނުގައި އެ ކޮމާންޑުގެ ޓްރެއިނިންގ ޔުނިޓްގެ 02 މުވައްޒަފުން، އައްޑޫސިޓީގައި ކުރިޔަށް ގެންދިޔަ ޓްރެއިނިންގ އަށް ގޮސްފައިވަނީ އެޗް.ޕީ.އޭ ގެ ގައިޑްލައިން އާއި އެއްގޮތަށް ޕީ.ސީ.އާރް ޓެސްޓް ހަދާ ނެގެޓިވް ނަތީޖާ ލިބުމުން ކަމަށް އޭވިއޭޝަން ސެކިއުރިޓީ ކޮމާންޑުން ވަނީ ކަށަވަރުކޮށްދީފައެވެ. އަދި މި މުވައްޒަފުންގެ ފަރާތުން މި ބަލި ފެތުރުނުކަމަށް ތުހުމަތު ކޮށް ޚަބަރު ފަތުރާފައިވަނީ ޒިންމާދާރުކަން ކުޑަގޮތަކަށް ކަމުގައި އެ ނޫސްބަޔާނުގައި ވެއެވެ.
