މުޅި ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް އިންޑިއާ އިން 39 ހާހާ ގާތްކުރާ އަދަދަކަށް މީހުން ޕޮޒިޓިވްވެ، 543 މީހުން މަރުވެފައިވާ ކަމަށް އެ ގައުމުގެ މިނިސްޓްރީ އޮފް ހެލްތު އެންޑް ފެމިލީ ވެލްފެއާ އިން ހާމަކުރި އެންމެ ފަހުގެ ތަފާސް ހިސާބުތަކުން ދައްކައިފިއެވެ.
އެގޮތުން، އިންޑިއާ އިން 38،902 އެއްހާ މީހުން މި ބައްޔަށް ޕޮޒިޓިވްވެ، މިހާތަނަށް ބަލިޖެހުނު މީހުންގެ އަދަދު ވަނީ 1.07 މިލިއަނަށް އަރާފައެވެ. މިއީ އެ ގައުމުގައި ކޮރޯނާވައިރަސް ފެތުރެންފެށިފަހުން މިހާތަނަށް އެންމެ ގިނަ އަދަދަކަށް މީހުން ޕޮޒިޓިވްވި ދުވަހެވެ. އިންޑިއާ އިން މިއަދުގެ ހެނދުނާ ހަމައަށް ކޮރޯނާވައިރަހަށް 13،791،869 ޓެސްޓް ހަދާފައިވާ ކަމަށް ވެސް އެ ގައުމުގެ ހެލްތު މިނިސްޓްރީން ވަނީ ހާމަކޮށްފައެވެ.
މިހާރު މުޅި ދުނިޔޭން ތިންވަނަ އަށް އެންމެ ގިނަ އަދަދެއްގެ މީހުން ޕޮޒިޓިވްވެފައިވާ އިންޑިއާގައި އެންމެ ހާލަތު ގޯސް މަހަރާޝްތުރަ ސްޓޭޓުން އެކަނިވެސް 3 ލައްކަ އަށް ވުރެ ގިނަ މީހުން ބައްޔަށް ޕޮޒިޓިވްވެފައިވާއިރު، އެ ސަރަހައްދުން 11،596 އެއްހާ މީހުން ވަނީ މަރުވެފައެވެ.
އިންޑިއާގައި މިހާރު ބަލިޖެހޭ މީހުންގެ ތެރެއިން ކޮވިޑް-19ގެ އާދައިގެ ނުވަތަ މެދުމިންވަރަކަށް އަލާމާތްތައް ފެންނަ ފަރާތްތަކުގެ ކިބައިން 10 ދުވަސް ވުމުން ބަލީގެ އެއްވެސް އަލާމާތެއް ނުފެނިއްޖެނަމަ ކަނޑައަޅާފައިވާ އުސޫލުގެ ދަށުން މުޅީން ރަނގަޅުވީކަމަށް ނިންމާ އިތުރު ޓެސްޓެއް ހަދާކަށް ނުޖެހެއެވެ. އެހެންނަމަވެސް، މި ބަލީގައި ހާލުބޮޑުވާ ފަރާތްތައް މުޅީން ރަނގަޅުވީކަމަށް ނިންމަނީ އެއްވެސް އަލާމާތެއް ނުފެނި ކަނޑައެޅިފައިވާ މުއްދަތު ފަހަނައަޅައިގޮސް ދެން ހެދޭ ޓެސްޓުގެ ނަތީޖާ ނެގެޓިވްވުމުންނެވެ.
އެ ގައުމުން މިހާތަނަށް ބައްޔަށް ޕޮޒިޓިވްވި މީހުންގެ ތެރެއިން، 677,422 އެއްހާ މީހުން މުޅީން ރަނގަޅުވެފައިވާއިރު މިއީ ބަލިޖެހުނު މީހުންގެ 63 އިންސައްތަ އެވެ. އަދި މި ބަލީގައި މިހާރު ފަރުވާ ހޯދަމުން އަންނަ މީހުންގެ އަދަދު އުޅެނީ 370،000 އަށްވުރެ މަތީގައެވެ.
މުޅި ދުނިޔޭން ކޮވިޑް-19 އަށް ޕޮޒިޓިވްވެފައިވާ މީހުންގެ އަދަދު 14.4 މިލިއަނަށް އަރާފައިވާއިރު، މަރުވި މީހުންގެ އަދަދަކީ 604،984 އެވެ. އަދި މި ބަލީގައި މުޅީން ރަނގަޅުވި މީހުންގެ އަދަދު ވަނީ 8.6 މިލިއަނަށް އަރާފައެވެ.
