އާންމުކޮށް ބޭނުންކޮށް އުޅޭ ކާބޯތަކެތި އުރީދޫގެ އީ-ކޮމާސް ޕްލެޓްފޯމް ކަމަށްވާ މޫލީ އިން ވިއްކަން ފަށައިފި އެވެ.
އުރީދޫ އިން ބުނީ ކޮވިޑް-19 އާއި ގުޅިގެން ސަރުކާރުން ތަންފީޒުކުރައްވާފައިވާ ލޮކްޑައުންގެ ސަބަބުން، ފެން، މަސް އަދި އާންމުކޮށް ބޭނުންކުރާ ކާބޯތަކެތި ފޯރުކޮށްދޭ ފަރާތްތަކުން ދަނީ އޮންލައިންކޮށް ކަސްޓަމަރުންނާއި މުއާމަލާތްކުރުމަށާއި އުފެއްދުންތައް ޑެލިވަރކުރުމަށް މޫލީގެ އެހީތެރިކަމަށް އެދެމުންދާ ކަމަށެވެ.
އެހެންކަމުން ކުދި އަދި މެދު ފަންތީގެ ވިޔަފާރިތަކަށް އެހީ ވުމުގެ ގޮތުންނާއި، ކަސްޓަމަރުން ރައްކާތެރިކަމާއެކު ގޭގައި ތިއްބަވައިގެން ވިޔަފާރިކުރުމުގެ ފުރުސަތު ފުޅާކޮށްދިނުމުގެ ގޮތުން އާންމުކޮށް ބޭނުންކުރާ ކާބޯތަކެތި ވިއްކާ ވިޔަފާރިތަކާ ގުޅިގެން މޫލީ މެދުވެރިކޮށް މާލެ އަދި ހުޅުމާލޭގެ އެޑްރެސްތަކަށް ޑެލިވެރީގެ ޙިދުމަތާއެކު ފޯރުކޮށްދޭން ފަށާފައިވާ ކަމަށްވެސް އުރީދޫ އިން ބުނެއެވެ.
މި ޕްލެޓްފޯމްގެ ޚާއްސަ ކަމަކީ، ކުދި ވިޔަފާރިތަކާއި އޮންލައިން ރީޓެއިލަރުންނަށް، ފަސޭހަކަމާއިއެކު ކުރިޔަށްވުރެ ގިނަ ކަސްޓަމަރުންނާއި މުއާމަލާތް ކުރުމުގެ ފުރުސަތު ފަހިވެ، ހިލޭ ވެއަރހައުސް ޚިދުމަތާއި ޑެލިވަރީ ޚިދުމަތް ލިބުމެވެ. މި ހިދުމަތްތަކާއެކު، ރާއްޖޭގެ އެކި ހިސާބުތަކަށް ވަޔަފާރިތަކުގެ ޕްރޮޑަކްޓްތައް ފޯރުކޮށްދިނުމުގެ ފުރުސަތުވަނީ ފަހިވެފައެވެ. ވިޔަފާރި އޮންލައިންކޮށް، އިތުރަށް ފުޅާކޮށް އަދި ގިނަ ކަސްޓަމަރުންނަށް ހިދުމަތްދޭން ބޭނުންވާ ކޮންމެ ފަރާތަކަށްވެސް މޫލީ އިންވަނީ އެ ފުރުސަތު ހުޅުވާލާފައެވެ. އެއީ ސޯޝަލް މީޑިއާ ޕޭޖެއް މެދުވެރިކޮށްކުރާ ވިޔަފާރިއެއް ކަމުގައިވިޔަސް، ސުޕަރމާރުކޭޓްއެއް ކަމުގައިވިޔަސް އަދި ކަންމަތީ ފިހާރައެއް ކަމުގައިވިޔަސް މަރުހަބާ ކިޔާ ކަމަށް މޫލީ އިން ބުނެއެވެ.
ކުދި ވިޔަފާރިތަކަށް މި ހާލަތުގައި ކުރިމަތިވެފައިވާ ދަތިކަމަށް ލުޔެއް ހޯދައިދީ، މާލެ އާއި ހުޅުމާލޭގައި ވިޔަފާރި ހިންގުމަށާއި ކަސްޓަމަރުންނަށް މުއާމަލާތްކުރުމަށް އެހީތެރިވުމުގެގޮތުން، މޫލީއިން ވަނީ ޕްލެޓްފޯމް ފީ ނެގުން ހުއްޓާލާފައެވެ. މޫލީ މެދުވެރިކޮށް މިހާރު އެންމެ 24 ގަޑިއިރުގެ ތެރޭގައި ވިޔަފާރިތައް އޮންލައިންކޮށް ހިންގަން ފެށޭނެއެވެ.
މޫލީ އާއި އަލަށް ގުޅިފައިވާ ފަރާތްތައް:
މޫލީ އަކީ އޮންލައިން ޕޭމަންޓް، މުޅި ރާއްޖެއަށް ހިލޭ ޑެލިވަރީ، އީޒީ ރިޓަރންސް އަދި ފެންވަރު ރަނގަޅު އުފެއްދުންތަކާއި އެކު، ކަސްޓަމަރުންނަށް ޔަގީންކަމާއިއެކު ވިޔަފާރިކުރުމުގެ ފަސޭހަކަން ފަހިކޮށްދޭ ޑިޖިޓަލް ޝޮޕިންގ ޕްލެޓްފޯމްއެކެވެ.
“މޫލީގެ އެންމެ ކަމުދާ ކަމަކީ މާލެނޫން އެހެން ރަށްރަށުގައި އުޅޭ ކަސްޓަމަރުންނަށްވެސް ފަސޭހަކަމާއިއެކު ޚިދުމަތް ފޯރުކޮށްދެވުން. މޫލީއިން ދޭ ދޮރުން-ދޮރަށް ޑެލިވަރީ ސަރވިސްގެ ސަބަބުން، އުފެއްދުންތައް އެންމެ ރަނގަޅު ހާލަތުގައި ރައްކާތެރިކަމާއި އެކު ކަސްޓަމަރުންނަށް ފޯރުކޮށްދެވޭނެކަމުގެ ޔަގީންކަން އޮވޭ. މޫލީއަށް ސައިން-އަޕްކުރުމަކީ ވަރަށް ފަސޭހަކަމެއް އަދި ކޮންޓެކްޓް-ލެސް ޕޭމަންޓް ސިސްޓަމްގެ ސަބަބުން އިތުރުކަމަކާއި ވިސްނާކަށް ނުޖެހޭ.” ތަކެތިގެ ފައުންޑަރ، ޝަރީހާން ވިދާޅުވިއެވެ.
“މޫލީގައި ބައިވެރިވުމަކީ ވަރަށް ފަސޭހަ، ރަނގަޅު ފުރުސަތެއް. މިހާރުވެސް ވަރަށް ގިނަ ފަރާތްތަކަށް އަޅުގަނޑުމެންގެ އުފެއްދުން ފެނި، ކަމުގޮސްފައިވާނެކަން ޔަގީންކުރަން. ރާއްޖޭގެ އެކި ކަންކޮޅުތަކުގައި ދިރިއުޅޭ ފަރާތްތަކަށް ޚިދުމަތް ފުޅާކޮށް، އުފެއްދުންތައް ފޯރުކޮށްދިނުމަށް ބޭނުންވާ އެންމެހާ ވިޔަފާރިވެރިންނަށް މޫލީއިން ފޯރުކޮށްދެނީ ވަރަށް ރަނގަޅު ފުރުސަތެއް. އުރީދޫ އިން ފޯރުކޮށްދީފައި މިވާ ނުހަނު ބޭނުންތެރި މުހިންމު ޕްލެޓްފޯމްގެ އަގުވަޒަންކޮށް މި އަގުހުރި މަސައްކަތް ބަލައިގަންނަން.” ބްރޭންޑްލޫމް ބައި އެންމަކް މޯލްޑިވްސްގެ މެނޭޖިންގ ޑިރެކްޓަރ، މުހައްމަދު ނިޔާޒް ވިދާޅުވިއެވެ.
ރާއްޖެއަށް ފުރަތަމަ ފަހަރަށް، މުޅިން ތަފާތު އީ-ކޮމަރސް ބާޒާރެއްގެ ގޮތުގައި 2019ގެ އޯގަސްޓްމަހު ތައާރަފްކުރެވުނު މޫލީ މެދުވެރިކޮށް، މިހާރުވެސް 10000އަށް ވުރެ ގިނަ ޑެލިވަރީ ރާއްޖޭގެ އެކި ހިސާބުތަކަށްވަނީ ފޯރުކޮށްދެވިފައެވެ. އިތުރު ފަރާތްތަކުން މޫލީ އާއި ގުޅެމުންދާއިރު، މި ޕްލެޓްފޯމް އޮތީ ކުރިޔަށް ވުރެ ގިނަ ކަސްޓަމަރުންނަށް، ކުރިޔަށް ވުރެ ތަފާތު ގިނަ އުފެއްދުންތަކެއް ފޯރުކޮށްދިނުމަށް ތައްޔާރުވެފައެވެ.
ވިޔަފާރި އޮންލައިންކުރުމަށް ބޭނުންވާ ފަރާތްތަކުން [email protected] އަށް އީމެއިލް ކުރެއްވުމުން އެހީތެރިކަން ފޯރުކޮށްދޭނެއެވެ.
