ރައީސް އިބްރާހިމް މުޙައްމަދު ޞާލިޙް، ކޮމަންވެލްތު ދުވަހުގެ ތަހުނިޔާ ހުރިހާ މެންބަރު ޤައުމުތަކަށް ފޮނުއްވައިފި އެވެ.
ރައީސް ޞާލިޙް މިއަދު ކުރެއްވި ޓްވީޓެއްގައި ވަނީ ކޮމަންވެލްތުގެ 54 ޤައުމުގެ ހުރިހާ ރައްޔިތުންނަށް ދުވަހުގެ ތަހުނިޔާ ފޮނުއްވައިފަ އެވެ. އަދި ރައީސް ވިދާޅުވީ މީގެ ހަފްތާތަކެއް ކުރިން ދިވެހިރާއްޖެ އަލުން ކޮމަންވެލްތާއި ގުޅިގެން ދިއުމަކީ ރާއްޖެއަށް ލިބުނު ފަޚުރެއް ކަމަށެވެ. އަދި ކޮމަންވެލްތުން ދުނިޔޭގައި އެންމެންގެ ލާބައަށް ކުރަމުންދާ މަސައްކަތުގައި ދިވެހިރާއްޖެއިންވެސް ފުރިހަމަ އެއްބާރުލުން ދިނުމަށް ތައްޔާރަށް ތިބި ކަމަށްވެސް އެ ޓްވީޓްގައި ރައީސް ވިދާޅުވެފައި ވެއެވެ.
A very happy #CommonwealthDay to the citizens of all 54 member states of the Commonwealth. Maldives is proud to have rejoined the Commonwealth family a few weeks back, and we remain resolute to work collectively to further the Commonwealth’s role as a force for good in the world.
— Ibrahim Mohamed Solih (@ibusolih) March 9, 2020
ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ސަރުކާރުގައި ކޮމަންވެލްތާއި ވަކިވުމަށްފަހު ދިވެހިރާއްޖެ ކޮމަންވެލްތާއި އަލުން ގުޅުނީ މިދިޔަ ފެބުރުވަރީ މަހުގެ އެއްވަނަ ދުވަހު އެވެ.
ކޮމަންވެލްތަށް އަލުން ވަނުމަށް ހުށަހަޅައި، އެމަސައްކަތް ކުރިއަށްގެންދިއުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް 17 ނޮވެމްބަރު 2018 ވަނަ ދުވަހު މަޤާމުގެ ހުވާ ކުރެއްވުމަށްފަހު ނިންމެވި އެންމެ ފުރަތަމަ އެއްކަންތަކެވެ. ރައީސުލްޖުމްހޫރިއްޔާގެ ނިންމެވުމަށް ސަރުކާރުގެ ފުރަތަމަ ހަފްތާތެރޭ ކެބިނެޓުން ރުހުން ދެއްވުމުން، ރައްޔިތުންގެ މަޖިލީހުގެ ރުހުން ހޯދުމަށް ފޮނުއްވައި، ދިވެހި ރައްޔިތުންގެ އުއްމީދުތަކާއި އެއްގޮތަށް ކޮމަންވެލްތަށް ވަނުމަށް ރައްޔިތުންގެ މަޖިލީހުން ވަނީ ރުހުން ދީފައެވެ.
ރާއްޖެއިން ކޮމަންވެލްތަށް އަލުން މިވަނީ އެޖަމްއިއްޔާގެ 54 ވަނަ މެމްބަރު ޤައުމުގެ ގޮތުގައެވެ. ރާއްޖެއިން މީގެ ކުރިން ކޮމަންވެލްތުގެ މެމްބަރު ޤައުމެއްގެ ގޮތުގައި އޮތް އިރު ވަރަށް ގިނަ ހަރަކާތްތަކެއްގައި ދިޔައީ ބައިވެރިވަމުންނެވެ. އެގޮތުން ޒުވާނުންނާއި، ސިއްހަތާއި، ތައުލީމުގެ އިތުރުން އަންހެނުންގެ ހައްގުތަކުގެ ދާއިރާފަދަ ދާއިރާތަކުގައި މުހިއްމު މަސައްކަތްތަކެއް ކޮމަންވެލްތުގެ މެންބަރު ޤައުމެއްގެ ހައިސިއްޔަތުން ރާއްޖެއިން ކޮށްފައިވެއެވެ.
