ޗައިނާގައި ހުރި އެޕަލް ކުންފުނީގެ ފިހާރަތައް ބަންދުކުރަން އެ ކުންފުނިން ނިންމައިފިއެވެ. އެޕަލް ކުންފުނިން މިގޮތަށް ނިންމާފައި ވަނީ ޗައިނާގައި ހަލުވިކަމާއި އެކީ ނޮވެލް ކޮރޯނާވައިރަސް ފެތުރެމުން އަންނާތީ އެވެ.
އެޕަލް ކުންފުނިން ނެރުނު ބަޔާނެއްގައި ބުނެފައި ވަނީ ސިއްޙީ ތަޖުރިބާކާރުންގެ އިރުޝާދާއި އެކު އެ ކުންފުނީގެ ކޯޕަރޭޓް އޮފީސް ތަކާއި، ސްޓޯރ ތަކުގެ އިތުރުން ކޮންޓެކްޓް ސެންޓަރުތައް 7 ފެބްރުއަރީ އިން ފެށިގެން ބަންދުކުރަން ނިންމާފައިވާ ކަމަށެވެ. ނަމަވެސް ކުންފުނީގެ އޮންލައި ސްޓޯރ ހުޅުވިފައި ހުންނާނެ ކަމަށް އެ ކުންފުނިން މައުލޫމާތު ދެއެވެ.
Apple is closing ALL stores, corporate offices, and contact centers in China due to Coronavirus through Feb. 9, company says in statement. https://t.co/E5xGkgAkeS pic.twitter.com/bbpGN885n4
— Mark Gurman (@markgurman) February 1, 2020
ޗައިނާގައި ހުރި އެޕަލް ކުންފުނީގެ ފިހާރަތައް ބަންދުކުރަން އެ ކުންފުނިން ނިންމިއިރު އެޕަލް އިން ބުނީ ޗައިނާގެ ހާލަތު ވަރަށް ކައިރިން ބަލަމުން ގެންދާނޭ ކަމަށެވެ. ޗައިނާގައި އެޕަލް ކުންފުނީގެ ފެކްޓްރީތައްވެސް ހިންގައެވެ. އެ ކުންފުނީގެ ފެކްޓްރީތައް ޗައިނާގައި ހިންގަނީ ފޮކްސްކޮން ކުންފުނިންނެވެ.
ޗައިނާގައި ފެތުރެމުން އަންނަ ކޮރޯނާ ވައިރަސްގައި މިހާތަނަށް 200 އެއްހާ މީހުން މަރުވެފައިވާއިރު މި ވައިރަސް ވަނީ ދުނިޔޭގެ 20 އަށްވުރެ ގިނަ ޤައުމަށް ފެތުރިފައެވެ. އެތައް ހާސް ބަޔަކަށް މި ވައިރަސް ޖެހިފައިވާއިރު ދުނިޔޭގެ ސިއްޚަތާއި ބެހޭ ޖަމިއްޔާއިން ވަނީ ސިއްޚީ އެމެޖެންސީވެސް އިއުލާން ކޮށްފައެވެ.
