މާފުށި ޖަލުގައި ހިނގަމުންދާ ހަމަނުޖެހުންތަކާއި ގުޅިގެން، އިންސްޕެކްޓަރ އޮފް ކަރެކްޝަނަލް ސަރވިސް، އަޙުމަދު މުޙައްމަދުފުޅު އިއްޔެ މާފުށީ ޖަލަށް ޒިޔާރަތްކުރައްވައި، ޖަލުގައި ކަންތައްތައް ހިނގަމުންދާ ގޮތް ބައްލަވާލައްވައިފި އެވެ.
އަޙުމަދު މުޙައްމަދުފުޅު ވިދާޅުވީ ހުކުރު ދުވަހުން ފެށިގެން މާފުށީ ޖަލުގައި އޮފިސަރުންނާއި ރިމާންޑް ބަންދުގައި ތިބި މީހުންނާއި ދެމެދު ހިތްހަމަނުޖެހުންތަކެއް ހުރިކަން އެނގިގެން، އެކަން މޮނީޓަރ ކުރައްވަމުން ގެންދެވި ކަމަށެވެ.
އެގޮތުން ހުރި ކަންބޮޑުވުންތަކާއި ގުޅިގެން އޮފިސަރުން ގޮޅިތަކާއި ކައިރިއަށް ދިއުމުން އެކި ކަހަލަ ކާތަކެތި ޖަހާ ކަމަށާއި، ވާޖިބުތަކަށް ހުރަސް އަޅާކަމުގެ މަޢުލޫމާތު ލިބިފައިވާ ކަމަށް އޭނާ ވިދާޅުވި އެވެ.
އަޙުމަދު މުޙައްމަދުފުޅު ވިދާޅުވީ އެކަންތައްތައް އިތުރަށް އޮޅުންފިލުއްވުމަށްޓަކައި ގޮޅިތައް ބަލާފާސްކުރުމަށް ކަރެކްޝަންސްގެ ކޮމިޝަނަރ އޮފް ޕްރިޒަންސްގެ އެދިވަޑައިގަތުމުގެ މަތިން، އިއްޔެ މާފުށި ޖަލަށް ޒިޔާރަތްކުރައްވާފައިވާ ކަމަށެވެ. އަދި ގޮޅިތައް ބަލާފާސްކުރުމަށް އޮފިސަރުން ޙަރަކާތްތެރިވި މަންޒަރު ބައްލަވާލައްވާފައިވާ ކަމަށާއި، އިއްޔެގެ އޮޕަރޭޝަން ކުރިއަށް ގެންދިއުމަށް ބަންދުގައި ތިބި ބައެއް މީހުން ހުރަސް އަޅާފާއިވާތީ، ބާރުގެ ބޭނުން ކޮށްފައިވާ ކަމަށްވެސް އޭނާ ވިދާޅުވި އެވެ.
“އިއްޔެ މި ހިނގައި ދިޔަ ކަންކަމުގެ ޙަޤީޤަތް އޮޅޭ ގޮތަށް، އިންސްޕެކްޓަރ އޮފް ކަރެކްޝަނަލް ސަރވިސް (އައިސީއެސް)ގެ ނަން ބޭނުންކޮށް މީޑިއާ އަށް މަޢުލޫމާތު ހިއްސާކޮށްފައި ވުމަކީ ކަންބޮޑުވާ ކަމެއް”، އަޙުމަދު މުޙައްމަދުފުޅު ވިދާޅުވި އެވެ.
މާފުށީ ޖަލުގައި ހިނގަމުންދާ ހަމަނުޖެހުންތަކާއި ގުޅިގެން މޯލްޑިވްސް ކަރެކްޝަނަލް ސަރވިސް (އެމްސީއެސް) އިން އިއްޔެ ނެރުނު ބަޔާނެއްގައި ބުނެފައި ވަނީ މާފުށީ ޖަލުގައި ހަމަނުޖެހުން ހިންގި ރިމާންޑް މީހުންގެ ޝަކުވާ އަކީ ތަޙުޤީޤު ބަންދުގެ މުއްދަތު ދިގުވަމުންދިއުމާއި ބޭސްފަރުވާގެ އިންތިޒާމްތައް އެމީހުން އެދޭ ގޮތަށް ކުރިއަށް ނުދިއުން ކަމަށެވެ.
އެ ކަންތައްތަކަކީ ކަރެކްޝަންސްގެވެސް ކަންބޮޑުވުންތަކެއް ކަމަށާއި، އައިސީއެސް އާއި ކޮމިޝަނަރ އޮފް ޕްރިޒަންސް ޢަބްދުﷲ މުނާޒާއި އެސިސްޓަންޓް ކޮމިޝަނަރ އޮފް ޕްރިޒަންސް މުޙައްމަދު ޢާސިފް ރިމާންޑްގައި ތިބި މީހުންގެ ހާލަތު ދެނެގަތުމަށް އިއްޔެ ޖަލަށް ޒިޔާރަތްކުރައްވާފައިވާ ކަމަށް އެ ބަޔާނުގައި ވެއެވެ.
އަދި ފުލުހުންގެ ދެ އޮފިސަރުން ޖަލަށް ޒިޔާރަތްކުރައްވާފައި ވަނީ ރިމާންޑްގައި ހުރި މީހަކަށް ގޮޅީގައި ތިބި އެހެން މީހުން އަނިޔާކުރި މައްސަލައެއް ތަޙުޤީޤު ކުރުމަށްޓަކައި ކަމަށައި، ރިމާންޑްގައި ތިބި މީހުންނާއި އޮފިސަރުންނާއި ދެމެދު ކުރިމަތިލުމެއް ހިނގާފައި ނުވާ ކަމަށްވެސް އެ ބަޔާނުގައި ވެއެވެ.
ކަރެކްޝަންސް އިން ބުނީ ރިމާންޑް މީހުން ހިތްހަމަނުޖެހި އޮފިސަރުންގެ ގަޔަށް ކާބޯތަކެތި ޖަހަމުން ގެންދިޔަ ނަމަވެސް، ޖަލު އޮފިސަރުން ވަނީ ކެތްތެރިކަމާއެކު އެމީހުންނަށް ވިސްނައިދެވޭތޯ މަސައްކަތްކޮށްފައި ކަމަށެވެ.
